Nyimbo 79 - Libuka Lya Kuyela

Lilombelo lya kulamwina litunga

Lwimbo lwa Ashafwi

¹ Obe Nyambi, bantu bakakulemesha banyambi bowa banengini mu likona lyobe. Banabipishi Litala lyobe lya kuyela pe banalobeshe Yelushalema.

² Banashiyili makubi mituntu ya bakamilimo bobe, mituntu ya bantu bobe ba kuyela banayishiyi ku tunzama ngayi bayilye.

³ Bayitile mukeza wa bantu bobe ngo mema, mukeza wahwentele mu Yelushalema nimwamo, kami kwabulile muntu wakubafunda.

⁴ Tunahanduliwi ku bandambo betu, banatukumangizi na kutuhepa ku matunga atuzinguluka.

⁵ Obe Nyambi ya Ngula, kati ukatupilamina shikati nimwasho ndi? Kati lihungu lyobe likabanga, ngonehe mundilo ndi?

⁶ Tulila wukali wobe ha matunga abula kukulimuka, na ha wene ou wabulanga kulombela lizina lyobe.

⁷ Ndaba banazihi bazukulya Yakobo, banalobeshe litunga lyendi.

⁸ Hinga utushushwila wubi wa bankakazetu. Haya tuyuvwileko nceshe shawangu, ndaba tuli mu wukalu wawunene.

⁹ Obe Nyambi, tuyavwe Obe Mupulwishi wetu, ndaba ya wuwahe wa lizina lyobe. Tuyatile wubi wetu, ndaba ya lizina lyobe.

¹⁰ Shuma ngani matunga akamba ngayi, “Haya Nyambi yenu uli kuti?” Mwanga tukumone ushushula matunga ndaba ya kuvwisha mukeza wa bakamilimo bobe.

¹¹ Yuvwilila ku shunga kwa batuyili mu tolongo. Na ngovu zobe zazinene lamwina obo banayatiwili kufwa.

¹² Obe Mwene, hingishila matunga yamina bikati mutanu na bibili ndaba ya lihandu banakuhandulu.

¹³ Niho etu bantu bobe, bambelele bamu litanga lyobe, tukakukambilila mwaya myaka, na kukuyemeza ku bihemwinino bya kumbili nimwabyo.