Nyimbo 78 - Libuka Lya Kuyela

Nyambi na Bantu bendi

Lwimbo lwa Ashafwi

¹ Yuvwililenu, ebye nikumilongesha, enu bantu bami, bangulenu matu kunebye nikwamba.

² Nikayahamisha kanwa kami mu zinguli na kutontolola byambo bya ku mwaka.

³ Byuma twayuvwile na kubilimuka, byuma ebye batutongwezele batatizetu.

⁴ Kukabilimba ku banabetu tufwako, ngoboni tukabitongweza ku shihemunwino sha kumbili, bya ngovu za Nyambi ya Ngula na milimo yendi yayinene na byuma bya kukomokesha anatende.

⁵ Nyambi wapanine mazu wendi ku Baishalela na ndayano ku bazukulya Yakobo. Wambilile bankakazetu ngayi balongeshe mazu wendi ku bana babo,

⁶ nohobene ngayi shihemunwino sha kumbili mwanga bakalilongeshebyo, nanibo kami mwanga bakalongeshe bana babo.

⁷ Ha kutenda nehe, mwanga bakakulupile muli Nyambi pe bakabule kuvulama ebye anatende, pe bakwombatalenga ndayano zendi shikati nimwasho.

⁸ Bakabule kukafweka ngonehe bankakazabo, shihemunwino sha mafutufutu na kubula kwombatala, aba babulile kushumisha kukulupila kwabo muli Nyambi, kami kaliha bengile bakulunga kukwendi.

⁹ Baefulemu, bakakulwa na bipando bya mikunzi, bashintulukile ha mutena wa nzita.

¹⁰ Kaliha balamine kulimama kwabo na Nyambi, ngoboni bakanine kwombatala ndayano zendi.

¹¹ Bavulamine ebye atendele, na bikomokesho ebye abamoneshele.

¹² Ku meho a bankakazabo, Nyambi watendele bikomokesho mu mbuwa ya Zowani mu litunga lya Engepita.

¹³ Watapulwile liwate niho abapitishile mukati kalyo, wemikile mema awa engile ngonehe kashinko.

¹⁴ Ku shikati sha mwaana wabatwamininine na likumbi, kami ku wushiku wabatwamininine na liyeye lya mundilo.

¹⁵ Wapabwile mamanya mu libelelengwa, wabapanine mema amengi banwine ngo amu mampunga.

¹⁶ Watutwishile tushinzi twa mema mu limanya, pe mema akunkwile ngo amu mushinzi.

¹⁷ Ngoboni bazaminine kubipishila Nyambi, kami mulibelelengwa bafutukile na kulwisha Wakukangana.

¹⁸ Bezekele Nyambi mu mitima yabo, ha kumulomba byakulya biya bashingile kulya.

¹⁹ Bambile mazu a kulwisha Nyambi ngayi, “Kati Nyambi ukutwesha kupana byakulya muno mu libelelengwa ndi?

²⁰ Hinge ngayi wakamine ha limanya, pe mema ashabukile na ku hwenta. Kati ukutwesha kami kutupana byakulya ndi? Hinge kuholwela bantu bendi nyama ndi?”

²¹ Oho Nyambi ya Ngula abayuvwile wapilamine, niho alwishile Yakobo na mundilo, pe wukali wendi wakulwisha Ishalela wanenehele,

²² ndaba babulile kukulupila muli Nyambi, kami kaliha bamukulupilile ngayi ukabapulwisha.

²³ Wambilile makumbi kuyilu, pe bipana byalyo bya shinkulukile.

²⁴ Wa bapanikile muhaku wa mpeka wa fumine ku yilu, naku ba pulumwina maana ngayi balye.

²⁵ Nohobene bantu balile byakulya bya mangeloyi, wabapanine byabingi kupitakana ebye bashingilenga.

²⁶ Wapepokeshele mpepo ya ku mushamuko mu mayilu, na ngovu zendi waletele mpepo yaku mabukubuku.

²⁷ Watumine tuyoni ku bantu bendi twatwingi, ngonehe lihekelela lya ha shibumbo sha liwate.

²⁸ Niho Nyambi awishilile tuyoni mukati ka zintanda za bantu bendi, hahepi na munkungwa wabo.

²⁹ Bantu balile na kwikuta, ndaba Nyambi wabapanine ebye bashingilenga.

³⁰ Ngoboni oho shilolo banyikwe biya bashingilenga, oho byakulya bishili mu tunwa twabo,

³¹ Nyambi wabapilaminine na kuziha balume babo bangovu, na bandumbana babawahe ba Ishalela.

³² Hinge ndi ebye nimwabyo byaholokele, bantu batwalilileho Kubipisha. Hinge ndi kwekalile bikomokesho bantu kaliha bamukulupilile.

³³ Nohobene wamanishile matena wabo ngonehe mpepo, na kumanisha wumi wabo na malwa akubabazumuna.

³⁴ Oho Nyambi aleteshele ngayi bamo hakati kabo bazihiwe, obo bashalileho, bafutikilile kukwendi. Batengulukile na kulombela kukwendi na shitima.

³⁵ Banukile ngayi Nyambi niye Limanya lyabo, kami ngayi Nyambi Wakukangana niye mukakuba kuliza.

³⁶ Ngoboni bamwongezele, kowa sha kupwisha bambile.

³⁷ Kaliha bengile ba kupwisha kukwendi, kaliha bengile bakulunga kukulimama kwabo naniye.

³⁸ Nyambi wengile wa nceshe ku bantu bendi. Wabayatilile wubi wabo pe kaliha wabalobeshele. Bikati byabingi wabweshelengamo wukali wendi.

³⁹ Wanukile ngayi banengi bantu ba lutu lwa wuntu, bakufweka ngo mpepo yikuya na kupepoka na kubula ku bokamo.

⁴⁰ Bikati byabingi bamufutulukilile mu libelelengwa na kumupilamisha.

⁴¹ Bamwezekele Nyambi, kakengikengi, bayuvwishile kukola ku mutima, wa Kuyela wa Ishalela.

⁴² Bavulamine liboko lyendi, eshe abalamwinine ku bamalamo babo.

⁴³ Oho atendele milimo yendi ya kukomokesho mu litunga lya Engepita, na bilimukisho mu Zowani!

⁴⁴ Wafutwile mema amu mishinzi yabo kwinga mukeza, nohobene kaliha batweshele kunwa mema a mishinzi yabo.

⁴⁵ Watumine banzinzi mukati kabo, baya babayandishilenga na mambotwe aya alobeshele litunga lyabo.

⁴⁶ Watumine mikumbi mu kulya mbutoyabo na mikabo yamu mafuba abo yanongele ku mikumbi.

⁴⁷ Walobeshele mikolobozi yabo ya shinyanca na mvula wa mamanya kami mitondo yabo ya mikuyu yayumine ku mashika.

⁴⁸ Wazihile zingombe zabo na mvula wa mamanya na bambelele babo na lumuni lwa mvula.

⁴⁹ Wabamoneshele makando amanene na ku bakalihila shikuma na wukali wendi, ebye byezile ngo bantumwana ba lufu.

⁵⁰ Kaliha wabweshele wukali wendi hinge ku tetelela myoyo yabo, ngoboni wabazihile na wulweli wa ku kwanga ku pangiwa.

⁵¹ Wazihile bamyeli babo nimwabo babalume ha minkanda nimwayo ya Engepita mu zintanda za Hamu.

⁵² Niho afumishile bantu bendi ngo mulishani wa bambelele, pe wabendeshele mukati ka libelelengwa.

⁵³ Wabatwamininine shiwahe, pe kaliha batinine, ngoboni liwate lya kupwile bamalamo babo.

⁵⁴ Wabaletele mu litunga lyendi lya kuyela, ku lipili liya akomene na liboko lyendi lya shilyo.

⁵⁵ Watandilemo aba bazikilemo oho bantu bendi bayilenga na kulikaka, watapilile litunga kwinga likona lyabo mukati ka Baishalela na kupana makunka wabo ku bantu bendi.

⁵⁶ Ngoboni bafutulukilile Nyambi Wakukangana na kumwezeka. Kaliha bombatalile ndayano zendi,

⁵⁷ ngoboni bengile bamafutufutu na kubula kupwisha ngonehe batatizabo, bapopele ngo shipando sha mukunzi shinatentebele.

⁵⁸ Bamupilamishile oho bapehelelenga ku myanya yabo ya kulemeshela banyambi bowa, pe na tunankishi twabo twa kubaza bamuyuvwishile lihungu.

⁵⁹ Oho Nyambi ayuvwile wapilamine shikuma, pe niho akanine bantu bendi Baishalela.

⁶⁰ Wakanine mwanya wendi wa kuyela mu Shilo, munkungwa uya ekalilenga mukati kabo.

⁶¹ Wetabilishile bamalamo babo kutola Likwati lya Kulimama, shimonekesho sha ngovu zendi na wuwahe wendi.

⁶² Wapilamine na bantu bendi, na kwitabila ngayi bazihiwe na mukwale ku bamalamo babo.

⁶³ Bandumbana bazihiwile mu nzita, batunkanga babulile kwa kuyekiwa.

⁶⁴ Bakankombela bafwile ku mukwale, kami bamfwile babo kaliha babetabilishile kulila.

⁶⁵ Niho Hekulu wapindukile ngo unafumu ha tulo, wengile ngo mulume wa ngovu unakolwo waine.

⁶⁶ Watandile bamalamo bendi na ku bakoma, pe bekalile na lisheni lya kubula kumana.

⁶⁷ Ngoboni wakanine bazukulya Yoshefwa, kaliha wahatile mushobo wa Efulemu.

⁶⁸ Ngoboni wahatile mushobo wa Yunda na lipili lya Ziyoni elye ahakile shikuma.

⁶⁹ Wazikile mwanya wendi wa kuyela, ngonehe mayilu, wawushumishile ngonehe ha shuma naho hanci, mwaya myaka.

⁷⁰ Wahatile muka mulimo wendi Ndavita, wamufumishile ku matanga a bambelele,

⁷¹ oku alaminenga bambelele bendi, niho amwingile mwene wa Ishalela, na mulishani wa bantu ba Nyambi.

⁷² Ndavita wabalamine na mutima wakubula nguma, wabatwaminine shiwahe.