Nyimbo 77 - Libuka Lya Kuyela

Kubengezekiwa mu shikati sha malwa

Ku mukakwimbilisha wa mukulwane. Kuli Yendutani. Lwimbo lwa Ashafwi

¹ Nikulila na lizu lyalinene kuli Nyambi, nikubilikiza na lizu lyalinene ngayi mwanga anyuvwe.

² Ha mutena wa makando wami nikalombela kuli Mwene. Wushiku nimwawo, nikolola maboko wami na kulombela na kubula kukwanga, ngoboni moyo wami wakanine kubengezekiwa.

³ Oho nikwanuka bya Nyambi, nikutula moyo, oho nikuhanganika byendi, moyo wami ukubota.

⁴ Wakwatanga bikuku bya meho wami ngayi nibule kulangana, nikulikekula shikuma na kukwanga kwamba.

⁵ Nikuhanganika matena aku mwaka, nikwanuka myaka ya kunyima.

⁶ Nanukile lwimbo nembilile shikati sha wushiku. Nikaluhanganika shiwahewahe, nezekele ku shingishisha hanebye byatendiwilenga.

⁷ Nepwile ngayi, “Mwene kati ukatukenda mwaya myaka ndi? Kati wufwako kami kukatuyamiziza ndi?

⁸ Kati shishemo shendi sha mwaya myaka shikamana ndi? Kati shikulupisho shendi shinakwanga mwaya myaka ndi?

⁹ Kati Nyambi unavulama kwikala na nceshe ndi? Kati kupilama kwendi kunahingi mu nceshe zendi ndi?”

¹⁰ Niho kami nambile ngayi, “Shakunkolesha ku mutima, ndaba Wakukangana wafutuku.”

¹¹ Obe Nyambi ya Ngula, nikanuka milimo yobe yayinene, Ingoi, nikanuka bikomokesho watendele bya kushikale.

¹² Nikahanganika ha nimwabyo ebye unatende, na kuhanganika milimo yobe ya ngovu.

¹³ Obe Nyambi, byuma nimwabyo ukutenda bya kuyela. Kowa nyambi wamina wakufweka obe Nyambi wamunene.

¹⁴ Obe Nyambi, mukakutenda bikomokesho, wamoneshele ngovu zobe mukati ka matunga.

¹⁵ Na ngovu zobe wakulizile bantu bobe, bazukulya Yakobo na Yoshefwa.

¹⁶ Obe Nyambi, oho mema akumonene atinine, mampunga a liwate ankwancanine.

¹⁷ Makumbi alokeshele mvula, mishika ya mbyazekele mu makumbi, kami mimuni yamweshele mu zimbalila nimwazo ngonehe mivwi yinapuhiwi.

¹⁸ Kumbyazeka kwa mishika yobe kwayuvwanikile mukakundukundu, kumwesha kwa mimuni yobe kwamunikile mukaye, hanci hakankile pe hanyenkanine.

¹⁹ Wendele mu nzila yapita mu mankanyi, wazabukile mu mampunga a liwate lya kunonka, ngoboni myanza yobe kaliha yamonekele.

²⁰ Watwamininine bantu bobe ngo mulishani wa bambelele, na liboko lya Moshesha na Aloni.