Nyimbo 76 - Libuka Lya Kuyela

Nyambi Mukakukona

Kuli mukwimbilisha nyimbo. Na bya kuliyavwisha kumbeta bya Nyimbwa. Lwimbo lwa Ashafwi.

¹ Nyambi unalihololo mu litunga lya Yunda, lizina lyendi lyalinene mu Ishalela.

² Wekala na ntanda yendi mu Yelushalema, ha lipili lya Ziyoni niho azika.

³ Niko apokwezelanga mivwi ya bamalamo bendi, makebo na mikwale, hamo na bilwisho byabo bya nzita nimwabyo.

⁴ Uli wa maleema, uli wamunene shikuma kupitakana mapili akushikale.

⁵ Banzita babo ba kukanca banayangiwi ebye bekalile nabyo nimwabyo. Bahoyokele mutulo twa ngonzi. Banzita babo nimwabo kowa watweshele kulilwila na liboko lyendi.

⁶ Obe Nyambi wa Yakobo, oho wabambilile, bambishi na bakakukandamaho bawile hanci ba kufwa.

⁷ Ngoboni obe, Nyambi ya Ngula, watiniwa ku bantu nimwabo. Yani wakutwesha kwimana ku lupala lwobe oho wapilamakale.

⁸ Oho uli omo muyilu wayatile hano hanci, ba hano hanci batinine na ku mwena.

⁹ Oho Obe Nyambi wakatukile na kuyata, na kulamwina bakuyandishiwa hano hanci.

¹⁰ Mwa shikuma hinge ndi bantu ba kupilama ngoboni bakakuyemeza, obo bakapanza ku wukali wobe bakapinganga bimbo byobe.

¹¹ Panikenu Nyambi ya Ngula Nyambi yenu ebye mwamukulupishile, muletelenu bishemo, enu matunga a hahepi nimwenu. Nyambi wayuvwishanga bantu bowa.

¹² Niye wabaletelanga kulishepesha batulela bakuliyemeza, niye wakutinisha ku bamyene ba hanci.