Nyimbo 74 - Libuka Lya Kuyela

Lilombelo lya kulamwina Litunga

Lwimbo lwa Ashafwi

¹ Obe Nyambi, kati shumangani unatufutaminini nehe? Kati shumangani ukaliwobe ukututuma ha bantu bobe ngonehe mundilo?

² Anuka bantu bobe obo wahatile kushikale, aba wakulizile kufumisha mu wulungo ngayi benge mushobo wa likona lyobe. Anuka lipili lya Ziyoni, oku wekalile.

³ Yeka wende yende hanebye binalobo. Bamalamo betu banalobeshe byuma nimwabyo bya mu Litala lyobe.

⁴ Bamalamo bobe ba kukuwa na kulishamba mu shikungulukilo shobe, bakwimika zindembela zabo kwinga bilimukisho.

⁵ Bamonekele ngo bakakutema bitondo mu lishaka lya kuzika.

⁶ Bamungwezele bitondo bya kubaza shiwahe na wulongo na tuzembe twabo na bikoma.

⁷ Bahokeshele Litala lyobe lya kuyela na mundilo, babipishile mbalila oku balemeshelenga lizina lyobe.

⁸ Balyambishile nibo bamwine ngayi, “Tukabancancola peluu,” bahokeshele zimbalila nimwazo za kulemeshela Nyambi mu litunga.

⁹ Ku mona bilimukisho byetu hitufwako, hikowa na miluwe ba Nyambi banashalako, kami hakatiketu kowa ukulimuka ngayi shuma eshe shikashimba matena anga.

¹⁰ Obe Nyambi, kati bamalamo betu bakatushilawiza shikati sha kukuma hati? Kati bamalamo bakahandula lizina lyobe mwaya myaka ndi?

¹¹ Kati shumangani unakanini kutuyavwa? Shuma ngani unavungili liboko lyobe lya shilyo?

¹² Ngoboni Obe Nyambi naku mwaka, obe uli mwene yetu. Unalete kupulwisha hano hanci bikati byabingi.

¹³ Na ngovu zobe zazinene watapulwile liwate. Wapabwele mitwe ya tuyamana bamu mema.

¹⁴ Wacancwele mitwe ya Libiyatani, na kulelesha lutu lwendi tunzama twa mu libelelengwa.

¹⁵ Wakunkwishile mema mu tuheloke na mu tushinzi twatushe, wayumishile mishinzi yayinene.

¹⁶ Obe walengele mwaana na wushiku, wayakile mutena na ngonda mu myanya yabyo.

¹⁷ Wayakile zinginza za hanci, watendele mayinza na mupepo.

¹⁸ Ngoboni Obe Nyambi ya Ngula, anuka ngayi, bamalamo bobe ba ku kushilawiza, pe kami bihulahuli banahandulu lizina lyobe.

¹⁹ Hinga upana wumi wa nkilimba yobe Ishalela ku tunzama. Hinga uvulama bantu bobe bakuyandishiwa.

²⁰ Anuka kulimama walimamine nanetu. Ndaba kuzimbalila za mincimpwe za hano hanci kwazika bantu banguma.

²¹ Hinga ulehela bakakuyandishiwa ngayi bayuvwe lisheni. Bakuyanda na bancepwe bayemeze lizina lyobe.

²² Obe Nyambi, katuka, uyimanine shambo shobe. Anuka ngayi bakakubula Nyambi ba kukushilawiza mutena nimwawo.

²³ Hinga uvulama kubwaya kwa bamalamo bobe, hinge kuvulama miyoyo ya kutwalilila ba kutenda bamalamo bobe.