Nyimbo 73 - Libuka Lya Kuyela

Libuka lya wuhatu Kupwisha kwa Nyambi

Lwimbo lwa Ashafwi

¹ Mwa shikuma Nyambi wenga wamuwahe ku Baishalela, kukwabo bali na mitima ya kuyela.

² Ngoboni nehi ami nashingile kupukazala, mawulu wami ashingile kuhenutuka,

³ ndaba nekalile na ntalu ku bakakuliyemeza, oho namonene kutangama kwa bakuluwa.

⁴ Ndaba kuyanda bafwako, zinyutu zabo za ku shuma na kulembuka.

⁵ Kuyanda nehe baminabo bafwako, ku mona makalikiza nehe baminabo bafwako.

⁶ Kami kuliyemeza kwabo kuku moneka ngonehe mukali wamu ncingo, na mishunga yiku moneka ngonehe bivwalo ba kuvwala.

⁷ Mu mitima yabo mu kututika byabibi, kami bihanganiko byabo binenzala na bifungo byabibi.

⁸ Bakuhengamina baminabo na kwamba byuma byabibi, bakuliyemeza pe bakwamba bya kuyandisha baminabo.

⁹ Bakuhandula Nyambi uli muyilu, ba kukulankanya mahalo na zindimi zabo ku bantu ba hano hanci.

¹⁰ Nohobene bantu ba Nyambi ba kutengulukila kukwabo, na kuyuvwilila nimwabyo ebye bakwamba.

¹¹ Bakwamba ngayi, “Kati Nyambi ukutwesha kulimuka nahiti? Kati Wakukangana wekala na kalimukisho ndi?”

¹² Eshe nisho bafweka bantu bakuluwa, kuliyakata bafwako na kuwezelela ku wuheti wabo shikati nimwasho.

¹³ Kati bishini nikulipokweshela nehe, ngayi ninge wa kuyela, hinga nabula kutenda wubi.

¹⁴ Ndaba nikumoneshiwa makando shikati nimwasho. Nili na ku shuziwa lumenemene na lumenemene.

¹⁵ Shinga nambile ngayi, “Nitengulukile kunebye batendanga,” mona, shinga nengile mukakubula kwoloka ku bantu baya ba kulemeshanga.

¹⁶ Ngoboni oho nezekele shikuma kuhanganika ha wukalu owe, shankaluhilile shikuma,

¹⁷ hantu noho nayile mu litala lyobe obe Nyambi, niho nayuvwishishile biya bikezilila bantu bakuluwa.

¹⁸ Mwa shikuma unabayaka mu zimbalila za kuhenena, pe ukabatwala kukuloba.

¹⁹ Bakalobeshiwa wangu, bakaya kumbalila ya mamaninino ya kutinisha.

²⁰ Bakufweka ngonehe mulo, ou wavulamiwanga kulumenemene, nohobene Obe Mwene oho ukemana, ukakenda bifwekesha byabo.

²¹ Oho moyo wami wekalile mu wunginga, nakolele shikuma ku mutima,

²² nabulile ku kuyuvwishisha kami nengile showa, nengile ngo kayamana kukwobe.

²³ Ngoboni nili hahepi na nobe shikati nimwasho, pe wankwata ku liboko lyami lya shilyo.

²⁴ Ukuntwaminina na kubela kwobe, pe ha kukotoka ukantambula mu wuwahe wobe.

²⁵ Kowa wamina nekala nendi uli muyilu, pe kami kowa shimina nashinga hano hanci ndele tuhu Obe.

²⁶ Lutu lwami na mutima wami bikutwesha kukwanga, ngoboni Nyambi niye nyala za mutima wami, niye tuhu wa mfuywelanga mwaya myaka.

²⁷ Mwa shikuma aba ba kukufutamina bakaloba, kami ukalobesha babengi bakubula kwoloka kukwobe.

²⁸ Ngoboni nehe ami, shinengi shashiwahe kwikala hahepi na Nyambi. Mwene Nyambi ya Ngula, Nyambi yami niye nafutuku kwinga shiholamino shami, ngayi mwanga nitontolole ebye nimwabyo anatende.