Nyimbo 72 - Libuka Lya Kuyela

Lilombelo lya mwene

Lwimbo lwa Sholomoni

¹ Obe Nyambi, pana mwene ngana za kuyata mu kupwisha, pako mwana mwene wa mulume kuyata mu kulunga.

² Nohobene ngayi mwanga akalele bantu bobe na kulunga, na kulela shiwahe bantu bobe ba kuyanda.

³ Mapili akaleta kutangama ku bantu, binkanda bikaleta kulunga.

⁴ Mwanga mwene ayate shiwahe shambo sha bantu ba kuyanda, mwanga emanine ba kuyanda pe akome bakakubayandisha.

⁵ Mwanga bantu bakulemeshe ku myaka nimwayo, ngonehe wekala mutena muyilu na ngonda atwanga wezi, ku bihemunwino nimwabyo.

⁶ Mwanga mwene afweke ngo mvula ukuloka mu mabuyishilo, ngo mamata aku zabisha hanci.

⁷ Mwanga bakulunga bahanye ha shikati sha kuyoya kwabo, kutangama kwihale shikuma hantu noho wezi wa ngonda muyilu ukamana.

⁸ Mwanga wene wendi ukabalika ku liwate limo na kukuma kulyamina, ku balika ku mushinzi wa Yufuleti na kutwala ku nkumo ya hano hanci.

⁹ Bantu bazika mu libelelengwa bakamulemesha, bamalamo bendi bakalivumba hanci.

¹⁰ Mwanga bamyene ba Tashishi na bamu bikuli baka mutupwilenga zintupu, kami bamyene ba Alembiya na Etopya baka muletelenga zintupu.

¹¹ Bamyene nimwabo baka mu shungumanina, matunga nimwawo akamulemesha.

¹² Ndaba walamwinanga ba kushepwa oho ba kumunyepa, na ba kuyanda baya banabulu wakubayavwa.

¹³ Uli na nceshe ha bakubula ngovu na ba kuyanda, ukupulwisha banabulu.

¹⁴ Ukubalamwina ku kuyandishiwa naku mishunga, kami mukeza wabo uli na ndando kukwendi.

¹⁵ Mwanga mwene ayoyenga shikati sha shitali. Mwanga apanikiwe ngolinde yaku Etopya. Mwanga bamutoyenga mu malombelo bikati nimwabyo, mfuywezi za Nyambi zikale hahendi shikati nimwasho.

¹⁶ Mwanga kwikale byakulya byabingi mu litunga, mwanga hayilu ya mapili hayinzale na byakulya. Mikabo yiyime shiwahe ngonehe yaku Lembanoni. Mwanga bantu bamu zinkena bahanye, ngonehi mwila.

¹⁷ Mwanga lizina lyendi hinga likavulamiwa, na niye kami aye mpupo shikati sha shitali ngonehe mutena. Bantu nimwabo mwanga bawane mfuywezi za Nyambi hahendi. Matunga nimwawo akamutoyenga ngayi mwene wakufuyweliwa.

¹⁸ Yemezenu Nyambi ya Ngula, Nyambi wa Ishalela, ninkayendi tuhu niye ukutenda byuma bya kukomokesha.

¹⁹ Yemezenu wuwahe wa lizina lyendi mwaya myaka, kami wuwahe wendi winzale hano hanci nimwaho. Ameni! Ameni!

²⁰ Awa niwo mamanino a malombelo a Ndavita mwana Njeshe.