Nyimbo 71 - Libuka Lya Kuyela

Lilombelo lya muntu wa mukulwane

¹ Obe Nyambi ya Ngula, mu mwobe nimo ni kuholama, hinga witabila ngayi niyuvwe lisheni.

² Uli wa kulunga, nyavwe na ku ndamwina. Tengeka litu lyobe kukwami mwanga umpulwishe.

³ Winge kukwami limanya lya kuholamina, na shipata shami sha ku shuma sha kupulukila. Obe limanya lyami na shipata shami.

⁴ Obe Nyambi yami, ndamwine ku liboko lya wakuluwa, na ku ngovu za bantu banguma na ku bantu bababi.

⁵ Obe Mwene, obe kulumbeza kwami, Obe Nyambi ya Ngula, na kulupila mu mwobe kufuma kuwanuke wami.

⁶ Nakinka mutima wami hahobe kufuma ha kuhemuwa kwami, obe wankingile mu livumo lya bamawa, haya nikukuyemeza bikati nimwabyo.

⁷ Wumi wami unengi mwanza ku babengi, ndaba obe shipata shami sha ku shuma.

⁸ Nikakuyemeza na kanwa kami mwapita matena na kutontolola wuwahe wobe.

⁹ Hinga unyumba ndaba ya wukulukazi wami. Hinga umfutamina, oho na kwangakale.

¹⁰ Bamalamo bami bakwamba mazu amabi hahami, aba bakushinga kunziha,

¹¹ pe bakwamba ngayi, “Nyambi unamufutamini. Tokonoko tumukonke tukamukwate, ndaba kowa muntu wakumulamwina.”

¹² Obe Nyambi, hinga wikala kwakutali na nami. Obe Nyambi yami, nyankupa unyavwe.

¹³ Obo ba kundwisha mwanga bakomiwe na kulobeshiwa, ngayi nibo bakushinga kundemeka mwanga bekale na lisheni na ku shampuliwa.

¹⁴ Nikakulumbeza pe nika kuyemeza shikuma.

¹⁵ Kanwa kami kakashimikila kulunga kwobe, na ntendelo ya ha kupulwisha kwobe matena nimwawo, ndaba wingi wabyo binapitakana ngana zami.

¹⁶ Obe Mwene, Nyambi wa ngovu nimwazo, nikayemeza ngovu zobe, nikabilika kulunga kwobe, obe tuhu ninkayobe.

¹⁷ Obe Nyambi, wandongeshele ku balika kuwanuke wami, kami nishili ku shimikila milimo yobe ya kukomokesha.

¹⁸ Obe Nyambi, hinga umfutamina oho na kulumpala kale na nzimvwi ku mutwe too, yikala hamo na nami hantu nabiliki ngovu zobe ku mikoka nimwayo ya kumbili.

¹⁹ Obe Nyambi, kulunga kwobe, kunakumu kuyilu. Obe Nyambi, Unatende byuma byabinene, kowa muntu waku kufweka.

²⁰ Unamoneshe makando na malwa, ngoboni ukambweshela nyala zami, ukamfumisha ku kalunga.

²¹ Ukanenehesha maleema wami, kami ukambengezeka.

²² Mwa shikuma nika kuyemeza na kambuli, Obe Nyambi yami nikayemeza kulunga kwobe. Ha kambuli kami kakashe nikakumbetela nyimbo, obe wa Kuyela wa Ishalela.

²³ Mivumbo yami yikawulumwina na ku wahilila. Oho nikembila na kukuyemeza na moyo wami nimwawo ou unalamwini.

²⁴ Nikamba na lulimi lwami ha kuyavwa kwobe kwa kulunga, matena nimwawo ndaba obo bashingile kundemeka, banakomiwi na kuyeneshiwa.