Nyimbo 69 - Libuka Lya Kuyela

Kulila kwakushinga kuyavwiwa

Ku mukakwimbilisha. Kwezekesha na Makandu. Lwimbo lwa Ndavita

¹ Obe Nyambi, ndamwine, ndaba mema anankumishili mu ncingo.

² Nili na kutapila mu ntiti ya kunonka, omo munabulu ha kuyimanina shiwahe. Nakumu ku limpunga pe libazi lili naku nkupula.

³ Nakwangakale na kukuwa ngayi unyavwe, kami mulibu wami unayuminini. Meho wami anazimbazimbi na kupenzelela, Nyambi yami.

⁴ Obo bananzimbi kwa kubula mulandu babengi shikuma, kupitakana huki za ku mutwe wami. Bamalamo bami bakwamba bya mahalo hahami, bakushinga kundobesha. Bakushinga ngayi nibapanike byuma nabulu kuyiba.

⁵ Obe Nyambi, hiulimuka eshe nayebele ku mwaka wubi wami kuholama kukwobe ufwako.

⁶ Obe Mwene, Obe Nyambi wa Makunge. Hinga witabila ngayi obo bakukulupila mumwobe bayuvwe lisheni ndaba ya nami, Obe Nyambi wa Ishalela, hinga witabila ngayi obo ba kukushinga bashampuliwe ndaba ya nami.

⁷ Nili na kukenduliwa ndaba ya lizina lyobe, kami nili na lisheni linafwiki lupala lwami.

⁸ Nafutuku muyeni ku bawushinda wami, kami nengi ngo lipukwenda ku bana ba bamawa.

⁹ Shitima sha Litala lyobe shinakuhokesha mumwami ngo mundilo, lihandu lya nobo ba kukuhandula linawili hahami.

¹⁰ Oho nikulila na kuzila kulya, bantu bakuhandula.

¹¹ Oho nikuvwala bya kucancoka, bantu bakuhepa.

¹² Bantu banekala ku lipangati lya munzi bambanga tuhu byami. Bakakukolwa malovu, ba kunyimbila.

¹³ Obe Nyambi ya Ngula nehe ami, nikalombelanga kukwobe. Obe Nyambi, nkumbule ku shikati unahata, ndaba ya shishemo shobe shashinene sha mwaya myaka. Na shikulupisho shobe sha kwoloka,

¹⁴ ndamwine ndaba nili na kutapila mu ntiti, ndamwine ku bamalamo bami naku mema a kunonka.

¹⁵ Hinga witabila libazi ngayi linkupule, hinge kundeha ngayi nifwe mu mampunga, hinge shinzimbi ngayi shimfwike.

¹⁶ Obe Nyambi ya Ngula, nkumbule, mu wuwahe wa shishemo shobe, penza kukwami na nceshe zobe zazinene.

¹⁷ Hinga uholeka lupala lwobe ku muka mulimo wobe, nili mu makando amanene, pe nkumbule shawangu,

¹⁸ Henyena kwakwipi na nami, pe nkulize, ndamwine ku bamalamo bami.

¹⁹ Obe hiulimuka eshe nahanduliwi, naneshe nashampuku na kubula maleema, ukulimuka bamalamo bami nimwabo.

²⁰ Lihandu lyabo linapokolo mutima wami, pe hano natampwakale. Nashingashingile wakunyuvwila nceshe, ngoboni kwengile kowa, nashingashingile bakakumbengezeka, ngoboni kowa wawaniwile hinge umo.

²¹ Oho nekalile na nzala bampanine bya kufwana. Oho nekalile na linyontwa, bampanine Vinenga.

²² Mwanga mayambwayambwa wabo afutuke kantamba, bimbo byabo bibalobeshe.

²³ Mwanga meho abo ashipe ngayi babule ku mona, mwanga myongo yabo yinyongame bikati nimwabyo.

²⁴ Yitila wukali wobe hahabo, kubanga kwa wukali wobe kwikale hahabo.

²⁵ Zintanda zabo zifutuke mapembe, ngayi mwanga kubule muntu wamina wakwikala mu minkungwa.

²⁶ Bakuyandisha aba unashushulu, bakwamba bya kuyandishiwa ha naba unalemeke.

²⁷ Wezelela kukashushwilo kabo, hinga bekala na shitapilo mu kupulwisha kwobe.

²⁸ Fumisha mazina wabo mu libuka lya babomi. Hinga ubafungila ku muhoko wa bantu bakulunga.

²⁹ Nili mu makando, kami nikuyuvwa kukola. Obe Nyambi, mwanga kupulwisha kwobe kunkatule.

³⁰ Nikayemeza lizina lya Nyambi na lwimbo, nikabilika wunene wendi na kumukambilila.

³¹ Eye niyo ntupu yikuwahilisha Nyambi ya Ngula, kupitakana pulu hinge nkomwana wa nkunzi uli na mashengo na zimpazi.

³² Bakakuyandishiwa bakamona milimo ya Nyambi, pe bakatangala. Mwanga mitima ya nobo bakushinga Nyambi, yishumankane.

³³ Nyambi ya Ngula wayuvwanga ba kuyanda, kami kuka kenda bantu bendi bali mu tolongo ufwako.

³⁴ Yemezenu Nyambi, enu liyilu na kaye, mawate na bibumbwabumbwa nimwabyo bilimo.

³⁵ Nyambi ukapulwisha Ziyoni. Na kutendulula minzi ya Yunda. Bantu bendi bakazikamo kami, na kukona Ziyoni.

³⁶ Bazukulya bakamilimo bendi bakalikona, pe aba bamuhaka bakazikamo.