Nyimbo 68 - Libuka Lya Kuyela

Lwimbo lwa litunga lwa ku wahilila ha kukoma

Ku mukakwimbilisha nyimbo. Lwimbo lwa Ndavita

¹ Nyambi akatuke, bamalamo bendi mwanga bapanzanishiwe, mwanga obo bamuzimba batine ku meho wendi.

² Ngonehe wakakumukanga wishe na mpepo, nohobene batande. Ngonehe nzunzulu ya nyongotokanga na mundilo, nahiyo kami bakawubi bakaloba ku meho a Nyambi.

³ Ngoboni bakulunga bakatangala na ku wahilila ku meho wendi, bakawahilila na kuwulumwina tunkelenkele.

⁴ Yimbilenu kuli Nyambi, yimbilenu nyimbo za kuyemeza lizina lyendi. Muwahishilenu nzila ou wendanga ha makumbi. Lizina lyendi niye Nyambi ya Ngula, tangalenu ku meho wendi.

⁵ Nyambi ya Ngula, tata banginga na mukakulama bamfwile. Nyambi ou wekala mu mwanya wendi wa kuyela.

⁶ Wapananga ba mpampu, mwanya wakwikalamo, na kututwisha batuyili mu tolongo na ku batangamisha, ngoboni bakakulwisha wabatandilile mu libelelengwa.

⁷ Obe Nyambi, obe wendelenga kumbili ya bantu bobe, obe wendele na kuwuluta nabo kuketula libelelengwa.

⁸ Hanci hanyenkanine mayilu alokeshele mvula ku meho a Nyambi, hinge ndi nilyo lipili lya Shinayi lyakankile ku meho a Nyambi, Nyambi wa Ishalela.

⁹ Nyambi walokeshele mvula wamwingi, wazabishile litunga lyendi oho lyengile lya kukwanga.

¹⁰ Bantu bobe bazikilemo, mu wuwahe wobe, obe Nyambi, waholwelele bancepwe.

¹¹ Mwene wapanine ndayano, pe bambuyama babengi bashimbile ncango zaziwahe.

¹² “Bamyene na banzita babo batinine, bambuyama ku minzi balitapilile lipuku,

¹³ hinge ndi balume bamo bakwikala mu mulaka wa bambelele. Lipuku lyamonekele ngonehe bankilimba banafwikiwi shiliva ha mbando, zikubyazima na wuwahe wa ngolinde.”

¹⁴ Oho Mpandashilanga apanzanishile bamyene, ha lipili lya Zalumoni walokeshele makelengo hahalyo.

¹⁵ Eshe lyaneneha, lipili lya Mbashani, lipili lyekala na mitwe yayingi, lipili lya Mbashani.

¹⁶ Kati shumangani enu bantu ba Mbashani, mukwikala na mwili ha lipili liya ahatile Nyambi ngayi ayikalengaho? Nyambi ya Ngula ukekalanga hayo mwaya myaka.

¹⁷ Na makoloyi wendi amengi a makulukazi na makulukazi, Nyambi, unafumu ku Shinayi unezi ku mwanya wa kuyela.

¹⁸ Unakankalala kupitula bantapwa babengi, unatambulu bishemo ku bantu hinge ku bakakufutulukila ngayi Nyambi ya Ngula, Nyambi mwanga akekalenga kuyo.

¹⁹ Yemezenu Mwene, Nyambi kupuluka kwetu, ou washimbanga miziho yetu ha mutena ha mutena.

²⁰ Nyambi yetu niye Nyambi wakupulukila. Niye Nyambi ya Ngula, Mwene yetu, ukutulamwina kukufwa.

²¹ Mwa shikuma Nyambi ukacancola mitwe ya bamalamo bendi, na tungumi twa baya ba kukakatila mu zinzila zazibi.

²² Mwene wambile ngayi, “Nikabwesha bamalamo benu kufuma ku Mbashani, nikababwesha kufuma mu mampunga a liwate,

²³ ngayi mawulu wenu akalilombe mu mukeza wabo, kami batuwa twenu bakatawe mukeza wabo ngo omu ba kushingila.”

²⁴ Obe Nyambi, kulikaka kwobe kwa kukoma kunamoneke, ha kwingina mu litala lyobe lya kuyela, obe Nyambi na Mwene yami.

²⁵ Kumbili kuli bakakwimbila, munyima yabo muli bakakumbeta, pe mukati kabo muli batunkanga bakakumbeta tuncingili.

²⁶ Yemezenu Nyambi mu shikungulukilo shashinene. Yemezenu Nyambi ya Ngula enu bazukulya Yakobo.

²⁷ Mushobo wawushe wa Mbenjamani, niwo winga muntanzi hakwiza, niho boni batulela ba Yunda na liziko lyabo, na batulela ba Zembuloni na Nafwitali bakabakonka.

²⁸ Obe Nyambi monesha ngovu zobe, ziya waliyavwishile kukwetu.

²⁹ Ndaba ya litala lyobe lya ku Yelushalema, oko ba kuletelanga zintupu bamyene.

³⁰ Kalihila Engepita uya kanzama uli mu matete, kalihila matunga, liya litanga lya bankunzi na manamani walyo, hantu noho banashintama hanci nimwabo na kutupula ntupu ya shiliva yabo. Panzanisha matunga aya ahaka nzita.

³¹ Bankamba bakafuma ku Engepita, Baetopya bakakatula maboko wabo na kulombela kuli Nyambi.

³² Enu wene nimwawo wa hano hanci, yimbilenu nyimbo za kuyemeza, kuli Nyambi, yimbilenu na kuyemeza Mwene,

³³ Yimbilenu kuli Nyambi ya Ngula ou ukwenda ha mbimbayilu, mbimbayilu yaku shikale. Yuvwililenu ku lizu lyendi, naku lukuwa lwendi lwa ngovu.

³⁴ Bilikizenu ngovu za Nyambi, kulela kwendi kuli ha Ishalela, ngovu zendi za kuma kuyilu.

³⁵ Nyambi wenga wakutinisha mu litala lyendi lya kuyela. Niye Nyambi wa Ishalela. Ukupana nyala na ngovu ku bantu bendi. Nyambi ayemeziwe!