Nyimbo 66 - Libuka Lya Kuyela

Lwimbo lwa kuyemeza na kukambilila

Ku mukakwimbilisha nyimbo. Lwimbo

¹ Enu bantu ba hanci nimwenu, yemezenu Nyambi na kuwulumwina tunkelenkele twa ku wahilila.

² Yimbilenu wuwahe wa lizina lyendi, mupanenu maleema a kumufwanina!

³ Ambenu kuli Nyambi ngayi, “Milimo yobe yakomokesha! Ngovu zobe zazinene, nohobene bamalamo bobe bakalamba na bowa kumbili yobe.

⁴ Bantu nimwabo hano hanci ba kukulemesha, bakwimbila nyimbo za kukuyemeza, bakwimbila na kuyemeza lizina lyobe.”

⁵ Yekenu mumone ebye anatende Nyambi, milimo yendi ya kukomokesha mukati ka bantu.

⁶ Wafutwile liwate kwinga lya kuyuma, bankakazetu bazabukile mushinzi hanci ha kuyuma. Twawahililile mumwendi ndaba yanebye atendele.

⁷ Walelanga mwaya myaka na ngovu zendi, meho wendi akupenza ha matunga. Bakakufutulukila banguma hinga bamulwisha.

⁸ Enu mikoka nimwenu, yemezenu Nyambi, kuyemeza kwenu kuyuvwanike.

⁹ Natulama mukati ka babomi, kami nakanishi mawulu wetu kuhenutuka.

¹⁰ Obe Nyambi, unatwezeke, ngonehe shiliva unashamishi na mundilo.

¹¹ Watutwaminine mu lunyimbwa, na kututwika miziho yayilemu ha myongo yetu.

¹² Watulehelele ngayi bamalamo betu batulyate ha mitwe, twenginine mu mundilo namu mema, ngoboni wuluno unatulete ku mwanya waku mwena.

¹³ Nikaleta nkombela ya kuhokesha ku litala lyobe, nikatupula kukwobe ebye nalihahile,

¹⁴ nikabitenda biya nambile na kanwa kami, oho nekalile mu makando.

¹⁵ Nikatupula bambelele ba ku shuwa ba kuhokeshela ha kaala. Nikatupula bankunzi na bampongo pe wishe ukaya mu mbimbayilu.

¹⁶ Yekenu! Muyuvwilile, enu bakakutina Nyambi! Nikamitongweza ebye anantendele.

¹⁷ Nabilikile kukwendi ngayi anyavwe, pe kami wayemeziwile na kanwa kami.

¹⁸ Shinga naholekele wubi mu mutima wami, shinga Mwene kaliha wanyuvwile.

¹⁹ Mwa shikuma Nyambi wanyuvwilile, wayuvwile lizu lya lilombelo lyami.

²⁰ Nyambi ayemeziwe ndaba kaliha wakanine lilombelo lyami, hinge kufumisha shishemo shendi sha mwaya myaka kukwami.