Nyimbo 65 - Libuka Lya Kuyela

Kuyemeza na kukambilila

Ku mukakwimbilisha nyimbo. Lwimbo lwa Ndavita

¹ Obe Nyambi, unafwanini kuyemeziwa mu Ziyoni, na kulama eshe twakulupishile,

² ndaba wakumbulanga malombelo. Bantu nimwabo bakeza kukwobe, ndaba ya wubi wabo.

³ Oho twakomiwile na wubi, watukulizile ku milandu yetu.

⁴ Bali na mfuywezi aba unahata, na ku bahenyeshela hahepi mukwikala mu mwanya wobe wa kuyela! Tukayikuta na byuma byabiwahe bya mu litala lyobe, na byabiwahe bya mu litala lyobe lya kuyela.

⁵ Obe Nyambi mukakukumbula, mukakutupulwisha na milimo yobe ya kukomokesha. Bantu nimwabo ba hano hanci, na naba bakwakutali bali mu nciza ya mawate, bakukulupila mumwobe.

⁶ Wemikile mapili mu mwanya wawo na nyala zobe, ku monesha ngovu zobe zazinene.

⁷ Wamweneshanga kukwancana kwa mawate na miyoyo ya mankanyi. Wamweneshanga kushongwanya kwa miyoyo ya bantu.

⁸ Nohobene ngayi nimwabo bazika hano hanci batine ha bilimukisho byobe. Bantu bobe ba kuwulumwina na tunkelenkele ndaba ya milimo yobe ya kukomokesha, kufuma ku mbalila yimo ya hanci kukakuma ku mbalila yamina.

⁹ Wafulankananga hanci na kuyitilila, waliyingishanga wilo. Wayitishanga tushinzi na mema na kuholola mbuto hano hanci, ndaba eshe nisho watendanga.

¹⁰ Walokeshanga mvula wamunene mu mafuba a mancenda na kubundalishawo, waboteshanga limvu na mamata na kufuywela zimbuto.

¹¹ Wapananga bishemo byobe mwaka wanzimba. Oku ukuya nimwako makoloyi wobe anenzala na byabingi.

¹² Mabuyishilo anenzala na matanga, binkanda binenzala na kutangala.

¹³ Mabuyishilo anenzala na bambelele, loto yinenzala mu mikulo. Bakuwulumwina na kuyimbila ndaba ya ku wahilila.