Nyimbo 62 - Libuka Lya Kuyela

Kukulupila mu kukingiwa kwa Nyambi

Ku mukakwimbilisha wa mukulwane. Kuli Yendutani. Lwimbo lwa Ndavita

¹ Hali Nyambi ninkayendi niho unakinki moyo wami, ndaba kukwendi niko kukufuma kupuluka kwami.

² Niye ninkayendi niye limanya lyami na kupuluka kwami, niye shiholamino shami, kami kuka komiwa nifwako.

³ Shikati sha kukuma hati enu nimwenu mukashintikiza muntu, ngayi mumukome ou nengi ngo limota linashendamini, na shipata shikushinga ku nyemuka?

⁴ Bakushinga kumupashula ha mwanya wendi wa maleema, ba kutangala hakwamba bya mahalo. Bakwamba mazu a kutandalisha, ngoboni mu mitima yabo ba kumukutula.

⁵ Hali Nyambi ninkayendi niho unakinki moyo wami, ndaba kukwendi niko kukufuma kulumbeza kwami.

⁶ Niye ninkayendi niye limanya lyami na kupuluka kwami, niye shiholamino shami, kami hinga nikatange kuka komiwa.

⁷ Muli Nyambi nimo muli kupuluka kwami na maleema wami, niye limanya lyami lya ngovu na shiholamino shami.

⁸ Enu bantu, kulupilenu muli Nyambi bikati nimwabyo. Mutongwezenu wukalu wenu nimwawo, ndaba niye shiholamino shetu.

⁹ Bantu nimwabo banengi ngo kufwoma kwa mu ku, bantu babanene naba babashe banengi bowa. Oho mu kubayaka ha bipimo bafwawo wulemu, nimwabo babahehu kupitakana mu ku.

¹⁰ Hinga mu kulupila mu mushunga, hinga mulumbeza mu kuwana shuma shimo na lipuku, hinge ndi wuheti wenu unahanya, hinga mukinka mutima hahawo.

¹¹ Nyambi wambile kamo, ami nalilongesheho byuma bibili, shuma nalilongeshe ngayi ngovu zenga zobe, obe Nyambi.

¹² Kami shishemo shobe sha mwaya myaka, Obe Mwene. Obe wapananga ncuungu bantu kwezeka na milimo yabo banatende.