Nyimbo 60 - Libuka Lya Kuyela

Lilombelo lya ku shoboloka

(Lwimbo lwa Ndavita, oho alwile na Kaalemiya Nahalayima na Alema Zomba, pe Yowambu wabokele na kuziha Baendoma 12,000 mu mukulo wa Mushele)

¹ Obe Nyambi, unatukana na ku shandula bipata byetu. Watupilaminine ngoboni haya boka utuyavwe.

² Unakankishi hanci, kami unalishiyi nyahamine. Haya wahisha mampananga alyo ndaba lili na kukanka.

³ Unashingishili bantu bobe ngayi bayande shikuma, tukutalangila ndaba ya waine unatupana ngayi tunwe.

⁴ Unayaka ndembela kunobo ba kukutina, ngayi wumoneshe kupwisha kwobe.

⁵ Tupulwishe na ngovu zobe. Kumbula lilombelo lyetu, ngayi bantu wahaka bapuluke.

⁶ Nyambi unakulupishi hinga ekala mu mwanya wendi wa kuyela unamba ngayi, “Mu ku wahilila kwakukoma nikatapa litunga lya Shekemu, na kutapishila mbuwa ya Shukota ku bantu bami.

⁷ Ngiliyande wami, Manashe kami wami. Efulemu hoshi yami ya nzita, Yunda muwana wami wawene.

⁸ Mowambi lwenga lulonga lwami lwa kukunama lwa kuyowelela. Endoma ukenga malyatilo a mawulu wami. Fwilishitiya nikalishamba ha kukoma.”

⁹ Obe Nyambi, kati yani ukantwala mu lukena lwa bipata? Kati yani ukantwaminina ha kukoma Endoma?

¹⁰ Obe Nyambi, unatukana kaliha noho ndi? Obe Nyambi, kuya ku nzita na banzita betu ufwako kaliha noho ndi?

¹¹ Tuyavwe kulwisha bamalamo betu, ndaba muntu kuyavwa kwendi kwenga kowa.

¹² Tukakoma ndi tuli hamo na Nyambi, niye ukalyatangila bamalamo betu.