Nyimbo 6 - Libuka Lya Kuyela

Lilombelo lya kunyepa kuyavwiwa mu shikati sha wukalu

Ku mukakwimbilisha, liyavwishe bya kumbetesha bya nyimbwa. Kwezekesha na Sheminiti. Lwimbo lwa Ndavita

¹ Obe Nyambi ya Ngula, hinga unkalihila hinga wapilama, Hinga uncushula na wukali wobe.

² Nyuvwileko nceshe, ndaba nina kuyanda. Mpane nyala ndaba napopo shikuma,

³ kami moyo wami uli na mutentu. Obe Nyambi ya Ngula, shikati sha kukuma hati ushili kutatilila ngayi unyavwe?

⁴ Obe Nyambi ya Ngula, yeka undamwine ku lufu ndaba ya shishemo shobe.

⁵ Muntu wakufwa kutwesha ufwako ku kwanuka. Mushinzimbi kowa muntu ukakuyemeza.

⁶ Napopo na ku shunga, wushiku nimwawo wulili wami ukuzaba na kulila. Muhamino wami unazaba na mihozi.

⁷ Meho wami aku mona ncishilile, anazimbazimbi na kupwezuma, oku banancingishili bamalamo bami.

⁸ Fumenu kukwami, enu bantu bakuluwa, Nyambi ya Ngula nayuvwu kulila kwami.

⁹ Mwa shikuma, nayuvwu kulila kwami kwakushinga kuyavwiwa, pe ukakumbula lilombelo lyami.

¹⁰ Bamalamo bami bakakomiwa, pe nimwabo bakekala na lisheni lyalinene, pe wanguwangu bakatandiwa mu mushunga.