Nyimbo 55 - Libuka Lya Kuyela

Lilombelo lya muntu wakubebiwa ku muhoni wendi

Ku mukakwimbilisha. Na bya kuliyavwisha bya kumbetesha bya nyimbwa. Lwimbo lwa Ndavita

¹ Obe Nyambi, yuvwa lilombelo lyami, hinga ufutamina ku kulambilila kwami.

² Nyuvwilile na kunkumbula, napopo na shikeku sha makando ami.

³ Natampwa na mafumbila a bamalamo bami, namfumfuliwi na kuyandishiwa ku bakawubi. Ndaba ba kuleta makando hahami ba kumpilamina na ku nzimba.

⁴ Mutima wami ukulwa mushali, pe bowa wa lufu wunangwili.

⁵ Bowa na kukanka bili hahami, pe nakomiwi na mutentu.

⁶ Niho nalyambishile ngayi, “Tawee, shinga nekalile na mbando, ngonehe nkilimba. Shinga natukili kwakutali ngayi nikakatale.”

⁷ Ee, shinga natinini kwakutali na kwikala mu libelelengwa.

⁸ Shinga nanyankupili ku munkungwa ngayi nitine kakundukundu na nkuli.

⁹ Obe Mwene yami, lobesha biyongola bya bamalamo bami, lempakanisha zindimi za bamalamo bami, ndaba namono mushunga na nkani mu lukena.

¹⁰ Bakuzinguluka mamota a lukena mwaana na wushiku, pe mukati kalwo muli malwa na makando.

¹¹ Mukati kalwo muli kulobeshiwa, kuyandishiwa na kwongeza, ebye bifwako kufuma mu zimbanza zabo.

¹² Shinga wengile kamalamo uya wahandwile shinga natweshele ku zumanana, shinga mukakunzimba niye wankatukilile, shinga naholamine.

¹³ Ngoboni obe muhoni wami naliyuvwashana nendi, muhoni wami waha mutima.

¹⁴ Twambolanga bya maholekela tuli babili, na kuya hamo mu Litala lya Nyambi.

¹⁵ Obe Nyambi, yitabila ngayi bamalamo bami, mwanga baye hibayoya mu kalunga. Mwanga baye hibakanka mu binzimbi byabo. Ndaba byabibi bili mu mitima yabo na mu matala wabo.

¹⁶ Ngoboni nikwihana kuli Nyambi ya Ngula, pe niye ukampulwisha.

¹⁷ Nikulihohoma na kulila kuli Nyambi ya Ngula, ku lumenemene na mwana na mazolo, pe niye ukayuvwa lizu lyami.

¹⁸ Ukalamwina moyo wami ku nzita, eye nikulwa ndaba bamalamo babengi banambelamini.

¹⁹ Nyambi, ou walelele kufuma kushikale, ukanyuvwa na ku bakoma, ndaba kulama mazu wendi hinge kumutina bafwako.

²⁰ Muhoni wami, unalwishi bahoni bendi, unakiluku kulimama kwendi.

²¹ Mazu wendi enga amawahe kupitakana lukaki, ngoboni uli na nzimbo mu mutima wendi. Nyambilo yendi ya kulemoka, ngonehe mazi akutelekesha, ngoboni akulemeka ngo mikwale yayitwe.

²² Tula muziho wobe kuli Nyambi ya Ngula, pe niye ukakulwila, kukaleha bantu bakulunga ngayi bakomiwe ufwako.

²³ Obe Nyambi, ukayumbila bamalamo bami na ba mahalo mu liteke lya kunonka, kukayoya kukuma ha shitika sha matena wabo bafwako. Neheboni ami, nika kulupila mumwobe.