Nyimbo 53 - Libuka Lya Kuyela

Wubi wa bantu

Ku mukakwimbilisha. Kuya na kwimbila kwa Mahalati. Lwimbo lwa Ndavita

¹ Bakuyeba ba kulyambashana mu mitima yabo ngayi, “Nyambi kowa.” Nimwabo banengi bababi, kami ba kutenda byuma bya wunyengwe. Kowa bakutenda byabiwahe.

² Nyambi kuyilu ukushengezela hanci ku bantu nimwabo, ngayi amone ndi ku bali bamo ba ku yuvwishisha, ba kushingashinga Nyambi.

³ Ngoboni bantu nimwabo banashanuku, nimwabo banabipi, kowa hinge umo ukutenda byabiwahe.

⁴ Kati bafwako kulimuka ndi? Kati baka wubi bali mu wulube ndi? Bali na ku yoyela ha ku yibila bantu bami, kami kaliha balombanga kukwami.

⁵ Ngoboni haya bakekala na bowa wawunene, uya babula kwikala nawo. Nyambi ukapanzanisha bifupa bya bamalamo ba bantu bendi. Bakekala na lisheni, ndaba Nyambi unabakana.

⁶ Tawee. Shinga ku puluka kwa Ishalela kukafuma ku Ziyoni. Nyambi ukatangamisha Baishalela kami, Yakobo ukatangala na Ishalela ukawahilila.