Nyimbo 52 - Libuka Lya Kuyela

Kuyata kwa Nyambi na nceshe zendi

Ku mukakwimbilisha nyimbo. Lwimbo lwa Ndavita, oho Ndoyengi waku Endoma wezile na akutongweza Shaulu ngayi, “Ndavita nezi ku litala lya Ahimeleki”

¹ Obe muntu wangovu, shumangani ukuliyemezela, na biyongola byobe byabibi? Nceshe za Nyambi zenga za mwaya myaka.

² Wayongolanga kulobesha baminobe, lulimi lwobe lunengi ngo mpoko ya mbeli yayitwe. Wabumbanga mahalo shikati nimwasho.

³ Wahaka byabibi kupitakana byabiwahe, wahaka kwamba mahalo kupitakana kwamba kupwisha.

⁴ Wahaka kwamba mazu akukolesha baminobe ku mutima, obe wa makula.

⁵ Nohobene, Nyambi ukakulobesha mwaya myaka, ukakuhukula na kukukokela ha munkanda wa litala lyobe ukafumisha mu litunga lya babomi.

⁶ Bantu bakulunga bakamona eshe, pe bakatina. Bakakuhepa na kwamba ngayi,

⁷ “Monenu, ou muntu wabulile kufutula Nyambi kwinga shipata shendi. Wakulupilile mu wuheti wendi wawingi, kami wafutwile wuheti kwinga shipata shendi.”

⁸ Ngoboni ami nafweke ngo mutondo wa olive wakubombola wamena mu Litala lya Nyambi. Nikukulupila mu nceshe za Nyambi za mwaya myaka.

⁹ Obe Nyambi, nika kukambililanga mwaya myaka, ndaba yanebye unatende. Nikayemeza lizina lyobe ku meho a bantu bobe bakwoloka, ndaba lyenga lyaliwahe.