Nyimbo 51 - Libuka Lya Kuyela

Lilombelo lya kuyatiwila

Ku mukakwimbilisha nyimbo. Lwimbo lwa Ndavita. Oho muluwe Natani ezile kukwendi ndaba ya kutenda wumambe na Mbatisheba

¹ Obe Nyambi, nyamizize, kuya na shishemo shobe. Fumisha milandu yami kuya na nceshe zobe zazinene.

² Nyoweshe shiwahe ku milandu yami, nyeleshe ku wubi wami.

³ Nikulimuka milandu yami, kami wubi wami uli kumbili shikati nimwasho.

⁴ Nabipishi kukwobe, obe ninkayobe, pe natende shibi ku meho wobe. Nohobene obe unamba bya kupwisha, na kuyata mukwoloka.

⁵ Mona, ami nahemuwila mu wubi, mawa wanyimitile mu wubi.

⁶ Mona, obe washinga kwoloka ku muntu wa mukati, nohobene ndongeshe ngana zobe.

⁷ Nyeleshe na hishopu, pe nikekala wa kuyela. Nyoweshe, pe nikayela shikuma kupitakana mpemba.

⁸ Nyintabilishe kuyuvwa kutangalala na ku wahilila, hinge ndi unancancolo na kunkolesha, nikawahilila kami.

⁹ Hinga upenza ku wubi wami, fwandula milandu yami yayibi nimwayo.

¹⁰ Obe Nyambi, lenga mumwami mutima wa kuyela shikuma, kami yaka mumwami moyo wawupya na wa kupwisha.

¹¹ Hinga untanda ku meho wobe, kami hinga ufumisha kukwami Moyo wobe wa Kuyela.

¹² Bokesha kukwami kutangala kwa kupulwisha kwobe, mpanike mutima wakukwombatala.

¹³ Mwanga nikalongeshe bakawubi zinzila zobe, pe bakatengulukila kukwobe.

¹⁴ Obe Nyambi mupulwishi wami, ndamwine ku mulandu wakuyita mukeza, lulimi lwami lukembila ndaba ya kulunga kwobe.

¹⁵ Obe Mwene, nyavwe sha kwamba, pe nika kuyemeza.

¹⁶ Kaliha washinga zinkombela, ndele nitupule kukwobe, hinge ndi nika kupana zintupu za kuhokesha, kuka kuwahilisha bifwako.

¹⁷ Nkombela washinganga, yinengi moyo wakulishepesha. Obe Nyambi, hinga ukana mutima wakulishepesha na wakutenguluka.

¹⁸ Obe Nyambi yuvwila nceshe Ziyoni na kumuyavwa, tendulula twimbi twa Yelushalema.

¹⁹ Niho ukawahilila na zinkombela za ku fwanina, zinkombela za kuhokesha na zintupu nimwazo. Niho bankunzi bakakombeleliwa ha kaala kobe.