Nyimbo 50 - Libuka Lya Kuyela

Kulemesha kwa kupwisha

Lwimbo lwa Ashafwi

¹ Nyambi ya Ngula, Nyambi wa Makunge, Ukwamba na kwihana ba hano hanci nimwabo ku mushamuko naku mponci.

² Nyambi ukubyazima hinga ekala mu Ziyoni, lukena lwa kubula shihepwa.

³ Nyambi yetu uli na kwiza, ngoboni kaliha ukwiza mu ku mwena, kumbili yendi unatwamiki mundilo, kami nkuli yayinene yinamuzinguluku.

⁴ Ukwihana mayilu na hano hanci, ngayi bapake Nyambi eshe akayata bantu bendi.

⁵ Niye ukwamba ngayi, “Kungwilenu bantu bami bakwoloka kukwami, obo bakombelele nkombela ya kulimama na nami.”

⁶ Mayilu akubilika kulunga kwa Nyambi, ndaba Nyambi niyemwine niye mukakuyata.

⁷ “Yuvwililenu, enu bantu bami, Ami nikamba, obe Ishalela, nikapaka byobe, Ami Nyambi, Nyambi yobe.

⁸ Kukakunyanca ndaba ya zinkombela zobe, za kuhokesha eze wa letanga kukwami nifwako.

⁹ Pe haya, kukashinga nkunzi waku litala lyobe nifwako, hinge mpongo wamu mulaka wobe.

¹⁰ Ndaba tuyamana nimwato twamu lishaka twenga twami, na zingombe zaha mapili zazingi shikuma.

¹¹ Nalimuka tuyoni nimwato twamu lishaka, na byuma nimwabyo byayoya mu lishaka byenga byami.”

¹² Hinge ndi shinga nekalile na nzala shinga kaliha nakutongwezele, ndaba kaye na byuma nimwabyo bilimo byenga byami.

¹³ Kati nalyanga nyama ya bankunzi, hinge kupubila mukeza wa bampongo ndi?

¹⁴ Tupulenu kuli Nyambi zinkombela zenu za kukambilila, kami tenda ebye wakulupishile Wakukangana.

¹⁵ Nyihane oho makando akakwizilila, pe nika kulamwina niho ukanyemeza.

¹⁶ Ngoboni ku wakuluwa Nyambi ukwamba ngayi, “Kati shumangani ukwambila ndayano zami? Na kwamba byaha kulimama kwami?

¹⁷ Ndaba wazimba kukutengulula, kami wakananga mazu wami.

¹⁸ Ukulikwata wuhoni na bezi aba uku mona nimwabo, kami walilumikilanga na baka wumambe.”

¹⁹ “Kutina kwamba byabibi mukanwa kobe ufwako. Lulimi lwobe lwa kupekanga bya mahalo.

²⁰ Wekalanga hanci, kutungulanga kawushinda wobe, na kubangila ou wahemuwa nendi livumo limo.

²¹ Oho watendele ebye nimwabyo, pe Ami namwenene. Kampe wahanganikile ngayi Ami nalifweka na nobe. Ngoboni haya nika kushushula, na kuku monesha nimwabyo unatende.

²² Haya hanganikenu shiwahe ha shuma eshe, enu mwavulamanga Nyambi, ndelewa nika kutabozola, kami kowa ou eze akamilamwine.

²³ Ou ukuleta nkombela ya kukambilila kukwami, niye ukumpana maleema. Ukwenda mu zinzila za kulunga, nikamumonesha kupuluka kwami.”