Nyimbo 5 - Libuka Lya Kuyela

Lilombelo lya kukingiwa

Ku mukakwimbilisha. Kuliyavwisha tu na mitolilo. Lwimbo lwa Ndavita

¹ Yuvwilila ku mazu wami, Obe Nyambi ya Ngula, yuvwishisha ku shunga kwami.

² Mwene yami na Nyambi yami, yuvwilila kulila kwami, ndaba nikulombela kuyavwiwa kukwobe.

³ Obe Nyambi ya Ngula, ku lumenemene wayuvwanga lizu lyami. Ha kututika kwa mutena nalombelanga kukwobe, nikutatilila kukumbula kwobe.

⁴ Obe uli Nyambi ou wazimba bakuluwa, kwitabilisha bakuluwa ngayi bekale hamo na nobe ufwako.

⁵ Kutwesha kwitabilisha bakuliyemeza ku meho wobe ufwako, Obe wazimba bakakutenda wubi.

⁶ Ukulobesha bakamahalo nimwabo, Nyambi ya Ngula ukukenda bakakuziha bantu na bakakwongeza.

⁷ Ngoboni ami nikatwesha kwingina mu Litala lyobe, ndaba ya shishemo shobe shashinene. Nikashungumana kukwobe na maleema, kukulemesha mu Litala lyobe lya kuyela.

⁸ Obe Nyambi ya Ngula, uli wakulunga, ntwaminine kutenda sha mutima wobe. Wahisha nzila yobe shiwahe ngayi niyikonke.

⁹ Ndaba mu tunwa twa bamalamo mowa kupwisha, mu mitima yabo bakufunga bya kulobesha. Mulibu wabo unengi shinzimbi sha kuyahama, bakwongeza na zindimi zabo.

¹⁰ Obe Nyambi, bayate na kubashushula, bifungo byabo byabibi bibalobeshe. Batande ku meho wobe ndaba ya wubi, ndaba bana kufutulukili.

¹¹ Ngoboni yitabilisha nimwabo, ba kuholama mu mwobe ngayi batangale, betabilishe bembilenga na kutangala. Pe ulamwine aba ba ku kuhaka, ngayi obo ba ku haka lizina lyobe, mwanga batangalilenga mumwobe.

¹² Obe Nyambi ya Ngula, ukufuywela bakulunga, kuyamiziza kwobe kuka bafwika ngonehe likebo.