Nyimbo 49 - Libuka Lya Kuyela

Kuyeba kwa kukulupilanga mu wuheti

Ku mukakwimbilisha nyimbo. Lwimbo lwa bana ba Kola

¹ Enu bantu nimwenu yuvwenu eshe. Enu bantu nimwenu mwazika muno mu kaye, tengekenu matu wenu.

² Yuvwenu nimwenu babanene na babashe, ba kuheta na ba kushepwa hamo.

³ Kanwa kami kakamba mazu a ngana, bihanganiko byami bakabiyuvwishisha.

⁴ Nikatengekela matu wami ku zincimpi, na kutontolola kashau oho nikumbeta kambuli.

⁵ Kati nafwanini kutina bikati byabibi bikwiza, oho bamalamo bakuluwa ba kunzinguluka ndi?

⁶ Obo ba kulupila na kulilundumika ha wingi wa wuheti wabo.

⁷ Mwa shikuma muntu kutwesha kulikuliza niye mwine ufwako, kutwesha kuyumba Nyambi ndando ha wumi wendi ufwako.

⁸ Ndaba ndando ya kukuliza wumi wa muntu yenga yayinene shikuma, kowa ukutwesha kuyiyumba,

⁹ ngayi uya muntu ayoye mwaya myaka, na kubula kufwa.

¹⁰ Mwa shikuma muntu nimwendi ukutwesha ku mona ngayi hinge bantu bangana bafwanga, ngonehe eshe bafwanga babileya na bakuyeba. Nimwabo bashiyanga wuheti wabo ku bamina.

¹¹ Binzimbi byabo, byenga minzi yabo mwaya myaka, kuyo niko bakekala shikati nimwasho, hinge ndi mwaka bekalilenga na litunga lyabo.

¹² Hinge ndi muntu ukaheta nahiti, ngoboni ukafwa ngonehe tuyamana.

¹³ Eye niyo ncuungu ya nobo bakukulupila mu byuma bya wuleya, niwo mamaninino anobo ba ku wahilila mu bihanganiko bya noho.

¹⁴ Banafwanini kuya ku kalunga ka bafu ngonehe bambelele, kami lufu lukenga ngonehe mulishani wabo. Bantu bakwoloka bakabakoma, oho zinyutu zabo zikabola, kalunga kabafu kwakutali na minzi yabo ya mwaka.

¹⁵ Ngoboni Nyambi ukakuliza moyo wami ku ngovu za lufu, nifwako kukatina ndaba niye ukantambula.

¹⁶ Hinga ulifulankana oho muntu akwikala na wuheti, oho wuheti wendi wamu litala ukavula shikuma.

¹⁷ Ndaba oho akafwa kukatwesha kuya nawo ufwako, wuheti wendi kukamukonka mu shinzimbi ufwako.

¹⁸ Hinge ndi ha shikati sha kuyoya kwendi wekalile na ku wahilila, hinge ndi bamuyemezele ndaba ya wuheti ekalile nawo,

¹⁹ ngoboni ukaya na kuliwana na mukoka wa batatizendi ku binzimbi, oku bakubula ku mona lumuni mwaya myaka.

²⁰ Hinge ndi muntu ukaheta nahiti ngoboni a kubula ngana, ukafwa tuhu ngonehe tuyamana.