Nyimbo 48 - Libuka Lya Kuyela

Ziyoni, Lukena lwa Nyambi

Lwimbo lwa bana ba Kola

¹ Nyambi ya Ngula niye wamunene pe unafwanini kuyemeziwa shikuma muyo mu lukena lwa Nyambi yetu, ha lipili lyendi lya kuyela.

² Lukena lwa lu wahe lwa Ziyoni ha lipili lya Nyambi, lukena lwa mwene wamunene lwaletanga ku wahilila hano hanci nimwaho.

³ Mu matala alwo, Nyambi namoneshe ngayi niye shipata shalwo.

⁴ Ndaba monenu, bamyene nimwabo bakungulukile, hamo na kulwisha lipili lya Ziyoni.

⁵ Ngoboni oho balumonene, balikomokelele shikuma, batinine na ku shintuluka kwituka.

⁶ Bekalile na kulikankila na makando, ngo mbuyama ha shikati sha kubeleka.

⁷ Na mpepo ya ku mushamuko yatabwele mato aku Tashishi.

⁸ Eshe tunayuvwu, nisho kami tunamono, mu lukena lwa Nyambi wa Makunge, Nyambi yetu. Ukalama lukena shiwahe mwaya myaka.

⁹ Mukati ka litala lyobe, Obe Nyambi, tunahanganiki ha nceshe zobe za mwaya myaka.

¹⁰ Ngonehe lizina lyobe, Obe Nyambi, nohobene mpupo yobe ya konkana hano hanci nimwaho. Liboko lyobe lya shilyo lya konanga bikati nimwabyo.

¹¹ Yitabila ngayi bantu ba ku Ziyoni batangale! Bana ba bambuyama ba mu Yunda bawahilile ndaba ya nyatilo yobe ya kupwisha.

¹² Zingulukenu lukena lwa Ziyoni, pe labokenu tupeshi twalo,

¹³ penzesheshenu twimbi twalo, na kuhengola bipata, ngayi mwanga mukatongweze bihemunwino bya kumbili ngayi,

¹⁴ “Ou Nyambi, niye Nyambi yetu mwaya myaka. Muka kututwaminina ku shikati nimwasho.”