Nyimbo 46 - Libuka Lya Kuyela

Nyambi ulinanetu

Ku mukakwimbilisha. Lwimbo lwa bana ba Kola. Kuya na kwimbila kwa Alamoti

¹ Nyambi niye shiholamino shetu na nyala zetu, watuyavwanga shawangu ha bikati bya makando.

² Hinge ndi hanci ha kunyenkana, hinge ndi mapili akuwila mu mampunga a liwate, kukatina tufwako.

³ Hinge ndi mema walyo akunkwancana na kutupula kayovu, hinge ndi mapili akunyenkanishiwa na mushunga.

⁴ Ku uli mushinzi ou bana bawo ba kutangalisha lukena lwa Nyambi, ku Litala lya kuyela lya Wakukangana.

⁵ Nyambi wekala mu lukena luyo, kami nilwo lufwako kukanyenkanishiwa. Ukanyankupila kuluyavwa ha kututika kwa mutena.

⁶ Matunga ali mu mishunga, wene unanyenkanishiwi! Nyambi ukukangoka na wukali, pe hanci ha kumyongotoka.

⁷ Nyambi wa Makunge uli hamo na netu, Nyambi wa Yakobo niye shipata shetu.

⁸ Yekenu. Mushembuke milimo anatende Nyambi wa Makunge. Monenu byuma bya kukomokesha anatende hano hanci.

⁹ Ukukanisha zinzita hano hanci nimwaho, ukupokozola bipando bya mukunzi, ukumungula milinga, na kuhokesha makoloyi na mundilo.

¹⁰ Nyambi ukwamba ngayi, “Lehenu kulwa, pe limukenu ngayi Ami Nyambi, ninaneneheshiwi mukati ka matunga, ninaneneheshiwi hano hanci nimwaho.”

¹¹ Nyambi wa Makunge uli hamo nanetu. Nyambi wa Yakobo niye shipata shetu.