Nyimbo 45 - Libuka Lya Kuyela

Lwimbo lwa maluwo a mwene

Ku mukakwimbilisha. Kwezekesha na Makandu. Lwimbo lwa bana ba Kola

¹ Mutima wami unatimbilili na mazu amawahe, nikwimbilila mwene olu lwimbo. Lulimi lwami lukufweka ngo shitikitisho sha mukakutikita wamanono, ou ukuliwahishila kutikita.

² Obe mwene uli wamuwahe kupitakana bantu nimwabo. Uli na nceshe hakwamba. Nohobene, Nyambi wakufuywelanga mwaya myaka.

³ Obe kanzita wangovu, mangila mukwale wobe ha ntungi, mu wuwahe wobe na maleema.

⁴ Mu maleema a wene wobe kandama yanga na kukona bamalamo bobe, kuya mu kulwila kupwisha na kuyata byakwoloka. Leha liboko lyobe lya shilyo litende milimo ya kukomokesha.

⁵ Mivwi yobe yenga yayitwe, yikuyaha mitima ya bamalamo ba mwene, matunga akalamba ku mawulu wobe.

⁶ Litanda lyobe, Obe Nyambi likekala mwaya myaka. Ukalela bantu bobe mu kupwisha.

⁷ Wahaka kupwisha na kuzimba wubi. Nohobene Nyambi, Nyambi yobe, na kuwabishi mazi akukutangalisha kupitakana baminobe bamyene.

⁸ Bivwalo bili na livumba lyaliwahe lya lukumba lwa miila na lilambwe na kashiya, misheke yobe ya kuwahishiwa na mayewe a banzovu muli tuhanzi twa ku kuwahililisha.

⁹ Bana ba bamyene babambuyama bali mu musheke, pe lihano unemana ku shilyo sha litanda lyobe na vwala bya kuliyenga bya ngolinde yayiwahe yaku Ofwila.

¹⁰ Yuvwilila ebye nikwamba, obe mwenga, yuvwishisha ebye nikwamba, vulama bantu bobe na lupashi lwa tatiyobe.

¹¹ Mwene ukaku haka ndaba ya wuwahe wobe, niye nengi hekulyobe, nohobene uku fwanina kumwombatala.

¹² Bantu ba kuheta ba ku Tile bakashinga kuyamiziza kwobe, ha kukuletela ntupu.

¹³ Monenu wuwahe, mwenga unakwingina mu musheke, na vwala bivwalo bya kutunga na kutowanisha bya ngolinde.

¹⁴ Hinga avwala bivwalo bya kutangatanga ba kumutwala kuli mwene. Pe batulembo ba bashimbi aba bamushindikiza, nanibo kami bakaletiwa kuli mwene.

¹⁵ Bakaya na kutangala na ku wahilila oho bakengina mu musheke.

¹⁶ Obe mwene yami, ukekala na bana babalume babengi bakashwana bankakazobe kwinga bamyene, bakenga batulela hano hanci nimwaho.

¹⁷ Nikatumbalalisha lizina lyobe ku bihemunwino nimwabyo, nohobene matunga nimwawo akakuyemeza mwaya myaka.