Nyimbo 44 - Libuka Lya Kuyela

Lilombelo lya kukingiwa

Ku mukakwimbilisha nyimbo. Lwimbo lwa bana ba Kola

¹ Obe Nyambi, etu twayuvwile na matu wetu, bankakazetu batutongwezele bya milimo, ha byuma byabinene biya watendele ha shikati shabo, mu matena akushikale.

² Obe watandile bakakulemesha banyambi bowa, na kuyakamo bantu bobe. Washushwile mikoka yamina, pe watumpwile bantu bobe.

³ Bantu bobe kaliha bakomene litunga na mikwale yabo, hinge na ngovu zabo, ngoboni bakomene na ngovu zobe, ndaba ya kubyazima kwa lupala lwobe.

⁴ Obe uli Mwene yami na Nyambi yami, wapananga kukoma kuli Yakobo.

⁵ Mu ngovu zobe tukayendwila hanci bamalamo betu. Mu lizina lyobe tukalyatangila hanci bakakutulwisha.

⁶ Ndaba kukulupila mu shipando shami sha mukunzi nifwako, hinge mukwale wami kutwesha ku ndamwina ufwako.

⁷ Ngoboni obe wa tulamwinine ku bamalamo betu. Kami unaluwanganishi obo batuzimba.

⁸ Tukaliyemeza muli Nyambi shikati nimwasho, tukakambilila mu lizina lyobe mwaya myaka.

⁹ Ngoboni Obe, unatukende na kwitabila ngayi tukomiwe, kami hiwufwako kwenda na banzita betu.

¹⁰ Watushintwile ku bamalamo betu, kami bamalamo betu balishimbilile byuma twapukwile.

¹¹ Watwitabilile ngayi tulobeshiwe ngonehe bambelele, watupanzanishilile mu matunga ashenge.

¹² Walandishile bantu bobe na ndando yayishe, kaliha washingile ndando yayinene hahabo.

¹³ Bandambo betu bamonene eshe watendele kukwetu, pe batukumangizile na kutuhepa.

¹⁴ Unatuhandwishi mukati ka matunga, nibo ba kunengokesha ku mitwe yabo hahetu na kutushilawiza.

¹⁵ Shikati nimwasho nili wakushampuliwa, na kwikala na lisheni,

¹⁶ mazu a makendu na lihandu lya bamalamo bami, na ku meho anobo banzimba.

¹⁷ Ebi nimwabyo byamonekele kukwetu, hinge noho kaliha twakuvulamine, hinge kukiluka kulimama oku walimamine nanetu.

¹⁸ Kaliha twengile ba kulungwa kukwobe, hinge kwinga bamalimbwilizi ku ndayano zobe.

¹⁹ Ngoboni hinge shingi noho watuhinyikilile mukati ka bambinzi watushiyile mu mincimpwe ya ku shipa shikuma.

²⁰ Shinga twavulamine lizina lya Nyambi yetu, na kwolola maboko wetu kuyilu na kulombela kuli nyambi washenge,

²¹ kati Nyambi shinga kutosha ufwako ndi? Ndaba niye walimuka bihanganiko bya kulimba bya mu mitima yetu.

²² Ngoboni shinengi sha mutima wobe ngayi tu zihiwenga shikati nimwasho, tu ku labiwa ngonehe bambelele bakuya mu ku zihiwa.

²³ Mwene, pinduka. Shuma ngani ukutendela ngo uli mutulo? Tona. Hinga utukaninina mwaya myaka.

²⁴ Kati shumangani ukutukanina? Kati shumangani unavulamini makalikiza na makando wetu.

²⁵ Ndaba moyo wetu walambalalilakale hanci, lutu lwetu lunalamatili ku lukungu.

²⁶ Katuka, wize mu kutuyavwa. Tulamwine ndaba ya shishemo shobe.