Nyimbo 42 - Libuka Lya Kuyela

Libuka lya wubili Lilombelo lya muntu uli mu wuntapwa

Ku mukakwimbilisha. Lwimbo lwa bana ba Kola.

¹ Obe Nyambi, ngonehe shineke ukuhekelela kashinzi ka mema a kubombola, pe nami kami moyo wami nisho ukukuhekelela.

² Nili na linyontwa lya kushinga Nyambi, Nyambi wakuyoya. Kati mutena ngani nikamona lupala lwa Nyambi?

³ Nikulila mwaana na wushiku, pe makando niwo anafutuku kwinga byakulya byami. Bamalamo bami ba kunyipula shikati nimwasho ngayi, “Nyambi yobe uli kuti?”

⁴ Oho nikwanuka bya ku mwaka mutima wami ukutabuka, oho nayilenga ku Litala lya Nyambi na makunge a bantu pe na batwamininenga, na ku wulumwina tunkelenkele twa ku wahilila na kukambilila, bembila na kuyemeza Nyambi ku shimbo.

⁵ Kati shumangani uku mona malwa obe moyo wami? Kati shumangani eshe ukulikekula nehe? Lumbeza muli Nyambi, ndaba nikamuyemeza kami, mulamwini na Nyambi yami.

⁶ Obe Nyambi yami, mutima wami unatabuku, nohobene nikakwanukanga mu litunga lya Yondana namu Helimoni naku lipili lya Miza.

⁷ Limpunga likwihana limpunga lyamina, na kuvuma kwa zimpupa zobe, mankanyi wobe nimwawo, amashe na nawa amanene anankupulu.

⁸ Nyambi ya Ngula aholole shishemo shendi sha mwaya myaka ku mwaana, pe ku wushiku mwanga nikembilenga lwimbo lwendi, nilombelenga kuli Nyambi wa wumi wami.

⁹ Nikwamba kuli Nyambi, limanya lyami ngayi, “Kati shumangani unamvulamini? Kati shumangani niku fwanina, kuyandishiwa ku bamalamo bami?”

¹⁰ Nahopoko mulutu na lihandu lyabo, aha ba kuzamina kunyipula ngayi, “Nyambi yobe uli kuti?”

¹¹ Obe moyo wami, kati shumangani uku mona malwa? Kati shumangani eshe ukulikekula nehe? Lumbeza muli Nyambi, ndaba nika kuyemeza, obe mulamwini wami na Nyambi yami.