Nyimbo 41 - Libuka Lya Kuyela

Lilombelo lya mukakukola

Ku mukakwimbilisha. Lwimbo lwa Ndavita

¹ Bali na mfuywezi obo bakulifulankana bakakuyanda, Nyambi ya Ngula ukabalamwina oho bali mu makando.

² Nyambi ya Ngula ukabakinga na kulama wumi wabo, ukabengisha ba ku wahilila mu litunga, kuka bashiya mu ngovu za bamalamo babo ufwako.

³ Nyambi ya Ngula ukabayavwa oho bakakola, pe ukabanyongomanisha ku malweli nimwawo.

⁴ Niho nambile ngayi, “Obe Nyambi ya Ngula, nakubipishili, nyuvwileko nceshe pe unyongomanishe.”

⁵ Bamalamo bami bakwamba byuma bya nguma hahami ngayi, “Kati ukafwa mwaka ngani ngayi lizina lyendi livulamiwe?”

⁶ Pe oho bakwiza na kunzingula ba ku monesha ngo banceshe, mitima yabo yikubumba byambo byabibi. Oho bakuya ba kuyishimba kuya na kuyikwayanisha nimwako.

⁷ Nimwabo aba banzimba ba kuliyebetela umo na wamina, ba kuhanganikila byabibi.

⁸ Bakwamba ngayi, “Wulweli wendi wawunene shikuma, kukapinduka ha wulili ufwako.”

⁹ Hingebene muhoni wami waha mutima, ou na kulupila, ou nalyanga nendi byakulya byami, unamfutulukili.

¹⁰ Obe Nyambi ya Ngula, winge wa nceshe kukwami, nyongomanishe ngayi nibabweshele wuwahe ku wubi.

¹¹ Wakatenda noho nikalimuka ngayi kati wawahilili na nami, ndaba bamalamo bami kaliha banankomo.

¹² Ukanyavwa, ndaba natendanga byakwoloka, ukandamanga na kunyinkalisha ku meho wobe mwaya myaka.

¹³ Yemezenu Nyambi ya Ngula, Nyambi wa Ishalela. Muyemezenu lelo na mwaya myaka. Ameni! Ameni!