Nyimbo 40 - Libuka Lya Kuyela

Nyimbo za kuyemeza Nyambi ya Ngula

Ku mukakwimbilisha nyimbo. Lwimbo lwa Ndavita

¹ Natatilile kuli Nyambi ya Ngula na lunzewe, niye watengulukilile kukwami pe wayuvwile kulila kwami.

² Wankokele mu liteke lya malwa, mu katapila kakabi, pe wanyimikile ha limanya, na kulama zintambo zami.

³ Nyambi wayaka lwimbo lwalupya mukanwa kami, lwimbo lwa kumuyemeza. Babengi bakamona eshe bakatina, pe bakakulupila muli Nyambi ya Ngula.

⁴ Bali na mfuywezi bantu obo bakukulupila muli Nyambi ya Ngula, aba bakubula kutengulukila ku tunakishi, hinge kuliwana nanobo bakulemesha banyambi bowa.

⁵ Obe Nyambi ya Ngula, Nyambi yami, unatutendele byuma byabingi shikuma, kowa waku kufweka. Unatutendele byuma byabingi bya kukomokesha. Shinga nabitoyatoyele nimwabyo shinga kaliha natweshele kubitoya, wingi wabyo wawunene wakubula kutwesha kulabiwa!

⁶ Ku shinga zinkombela na zintupu wufwako, ngoboni obe u na mpana matu akukuyuvwa. Ku shinga zintupu za kuhokesha hinge zintupu za ha wubi wufwako.

⁷ Niho nambile ngayi, “Ami wuno, nimwabyo byatikitiwa byami mu libuka lyobe lya ku zenga bikwamba byami.

⁸ Nikushinga kutenda shifungo shobe! Obe Nyambi yami, mulao wobe uli mu mutima wami.”

⁹ Nashimikili ncango za kulunga kwobe, mu shikungulukilo shashinene. Obe Nyambi ya Ngula, hiulimuka ngayi kaliha namwenene.

¹⁰ Kaliha naholekele mu mutima wami byambo bya kupulwisha, nonzelelenga kwamba bya kulunga kwobe na kupulwisha kwobe. Kaliha na baholekelele shikungulukilo shashinene bya shishemo shobe sha mwaya mwaka na kwoloka kwobe.

¹¹ Obe Nyambi ya Ngula, hinga uleha kwikala na nceshe kukwami. Shishemo shobe sha mwaya myaka na kwoloka bikandamenga shikati nimwasho.

Lilombelo lya kushinga kuyavwiwa

¹² Makalikiza amengi shikuma anzingulukile. Kubipisha kwami ku nankakatili, pe kutwesha ku mona hinifwako, kwakwingi shikuma kupitakana huki za ku mutwe wami, pe mutima wami unatampwa.

¹³ Obe Nyambi ya Ngula, Ndamwine! Obe Nyambi ya Ngula, nyankupisha kwiza na kunyavwa!

¹⁴ Mwanga obo bakushinga kunziha bayeneshiwe nimwabo na kuvulanganyiwa. Mwanga obo bakushinga ku hukula wumi wami, babokeshiwe mantenganyima na ku shampuliwa, obo bakushinga kundemeka!

¹⁵ Mwanga aba ba kungweluka bayeneshiwe, aba bakwamba kukwami ngayi, “Ehee, Ehee!”

¹⁶ Mwanga nimwabo ba kukushinga batangale na ku wahilila mumwobe, kami nimwabo bahaka kupulwisha kwobe bambenga ngayi, “Nyambi ya Ngula wamunene!”

¹⁷ Nehiboni ami, nili wakuyanda na kushepwa. Ngoboni Nyambi walifulankana na nami. Obe Nyambi yami! Mukakuyavwa na mulamwini wami, hinga wihala.