Nyimbo 39 - Libuka Lya Kuyela

Kwilitabila kwa muntu wa kuyanda

Ku mukakwimbilisha wa mukulwane. Kuli Yendutani. Lwimbo lwa Ndavita

¹ Nambile ngayi, “Nikalama zinzila zami, ngayi nikabule Kubipisha na lulimi lwami. Shikati shiya oho bantu bakawubi bakekala kumbili yami, nikafwika ha kanwa kami bikati nimwabyo.”

² Namwenene nee na kubula kwamba lizu, hinge ku mazu amawahe. Ngoboni makando wami ananenehele shikuma,

³ kami mutima wami wahokele mu shali. Oho nahanganikilenga mutima wami wabangile, niho nambile ngayi,

⁴ “Obe Nyambi ya Ngula, kati shikati sha kukuma hati nikayoya? Kati nikafwa mwaka ngani? Ntongweze wumi wami ukamana mwaka ngani.”

⁵ Mona, wumi wami eshe unawufwanikizi, ku meho wobe shikati sha kuyoya kwami shinengi showa. Mwa shikuma wumi wa muntu nimwendi unengi ngo mpepo yikukakuka.

⁶ Mwa shikuma, muntu unengi ngo mumvulu. Nimwabyo ebye akutenda binengi byowa, ukukungula wuheti, ngoboni kulimuka ou ukawushimba ufwako.

⁷ Obe Mwene, haya nikutatilila bishini? Kulumbeza kwami kuli mumwobe.

⁸ Mpulwishe ku wubi wami nimwawo, pe hinga witabilisha bakuyeba ngayi bankendule.

⁹ Nikamwena hulutuu, kukambako lizu nifwako, ndaba Obe unamoneshe awa makando anehe.

¹⁰ Hinga uncushula kami. Nili hahepi na kufwa ku zinkoni zobe.

¹¹ Oho ukushushula muntu naku mwambila, ndaba ya wubi wendi, ukulobesha wuheti wendi ngonehi atendanga mpenzi. Mwa shikuma muntu nimwendi wenga ngonehe mpepo yikukakuka tuhu.

¹² Obe Nyambi ya Ngula, yuvwa lilombelo lyami, kami yuvwilila kulila kwami, hinga umwenena mu kunyavwa oho nikulila. Ndaba nili muyeni, mukakwenda, ngonehe bankaka zami nimwabo.

¹³ Hinga umpenza mu wukali, ngayi mwanga nibule kutangala kami, oho shilolo nifwe na kubula ku moneka kami.