Nyimbo 38 - Libuka Lya Kuyela

Lilombelo lya muntu wakuyanda

Lwimbo lwa Ndavita, Lwa kulila

¹ Obe Nyambi ya Ngula, hinga unkalihila hinga wapilama, Hinga uncushula na wukali wobe.

² Mivwi yobe yinanyaha, kami liboko lyobe linancintilili.

³ Lutu lwami luli na ku mbyaza shikuma, ndaba ya wukali wobe. Lutu lwami nimwalo luli na wulweli ndaba ya wubi wami.

⁴ Nili na kukupuka mu libazi lya wubi wami, kukwami unafweke ngo muziho wawulemu shikuma ha kuwu shimba.

⁵ Bitombo byami byabolo, pe bili nakufushoka kunuka, ndaba ya kuyeba kwami.

⁶ Nalifwempeke hanci na cancoliwi, nikupwezuma kulila matena nimwawo.

⁷ Lutu lwami luli na kumbyaza na mashikashika, lutu lwami nimwalo kowa aha nikuliyuvwila shiwahe.

⁸ Napokokakale na kuhopoka shikuma mu lutu, pe nikushunga ndaba mutima wami uli mu makalikiza.

⁹ Obe Mwene, obe ukulimuka ebye nikushinga, wayuvwanga ku shunga kwami nimwako.

¹⁰ Mutima wami uli na kulwa, nyala zami zinamana, pe meho wami afwako ku mona shiwahe.

¹¹ Bahoni na bambayi kuhenyena hahepi hibafwako, ndaba ya bimakwa byami. Hinge ba lupashi lwami banemana kwakutali.

¹² Obo bakushinga kunziha banamanyiki tuntamba, kami obo bakushinga kundemeka ba kumfumbila ngayi bandobeshe, nibo kuleha sha kumbeba bafwako.

¹³ Ami nengi ngonehe muntu wakuzika matu, kuyuvwa nifwako. Ninengi ngonehe shimumu, kwamba nifwako.

¹⁴ Ninengi ngonehe muntu wakubula kuyuvwa, ndaba kutwesha kukumbula nifwako, oho bantu bakwamba na nami.

¹⁵ Ngoboni obe Nyambi ya Ngula, nikukulupila mumwobe, Obe Nyambi ya Ngula, Nyambi yami, ou ukankumbula,

¹⁶ ndaba nalombelele ngayi, “Hinga witabila bamalamo bami kutangalila ha makando wami, hinga ubetabilisha ngayi baliyemeze ha kuhenutuka kwa liwulu lyami.”

¹⁷ Nili na kushinga kuwa, kami makando wami kumfuma afwako.

¹⁸ Nikulitabila Kubipisha kwami, nayene shikuma hanebye ninatende.

¹⁹ Bamalamo bami bali na zinyutu zili shiwahe na ngovu, pe aba banzimba kwakubula mulandu babengi shikuma.

²⁰ Obo bakubweshela byabibi ku byabiwahe banengi aba ba kundwisha, ndaba nezekanga kutenda byabiwahe.

²¹ Obe Nyambi ya Ngula, hinga unciyamo ninkayami, hinga wikala kwakutali, obe Nyambi yami.

²² Haya nyankupila kukwami na kunyavwa, Obe Mwene, mupulwishi wami.