Nyimbo 37 - Libuka Lya Kuyela

Ebye bikaholoka kubakuluwa na babawahe

Lwimbo lwa Ndavita

¹ Hinga mulikekula ha bantu bababi, hinga mwinga mwili nanobo ba Kubipisha.

² Ndaba wuluno bazimine ngonehe kuyuma kwa mwila, pe bakalebuka ngonehe mashiha.

³ Kulupilenu muli Nyambi ya Ngula na kutenda shiwahe, nohobene ngayi mukazike mu litunga na kwikalamo shiwahe.

⁴ Tangalilenu muli Nyambi ya Ngula, pe niye ukamipana ebye mitima yenu yikushinga.

⁵ Kundikenu zinzila zenu kuli Nyambi ya Ngula, kulupilenu mumwendi, kami niye ukamiyavwa.

⁶ Biheka byenu bya kulunga, ukabibyazimisha ngonehe lumuni na ku shambisha kwenu kukabyazima ngonehe mutena mukati ka mutwe.

⁷ Tatililenu muli Nyambi ya Ngula, na kumuzengamina na lunzewe. Hinga mulikekula ndaba ya nobo ba kutangama mu zinzila zabo, oho ba kutenda bya kuluwa.

⁸ Lehenu kupilama, pe futaminenu wukali, ebye bikumitwala ku makando.

⁹ Obo bakukulupila muli Nyambi ya Ngula bakakona litunga, ngoboni bababi bakatandiwamo.

¹⁰ Kashikati tuhu kakashe bakuluwa kukamoneka bafwako, muka bashingashinga, ngoboni kuka bawana mufwako.

¹¹ Ngoboni obo ba kulilimbwilisha bakakona litunga, kami bakekala mu ku mwena kwakunene na kutangama.

¹² Bakuluwa bakayongwela byabibi bantu bakulunga, kami ba kulikekenyela ku mayewe hahabo.

¹³ Nyambi ya Ngula wahepanga bantu bakuluwa, ndaba niye nalimuku ngayi mutena wabo wakulobeshiwa wuluno ukume.

¹⁴ Bakuluwa ba kuhomona mikwale yabo na kunana bipando byabo bya mikunzi, ngayi bawishile hanci ba kushepwa na ba kuyanda na kuponda obo ba kutenda byakwoloka.

¹⁵ Ngoboni bakazihiwa na mikwale yabo nibo bamwine, bipando byabo bya mikunzi bikapokozoka.

¹⁶ Ebye banahete bakulunga, hinge bingi byabishe, bili kumbili kupitakana wuheti wawingi uya banahete bakuluwa,

¹⁷ ndaba Nyambi ya Ngula, ukamanisha nyala za bakuluwa na kukinga bakulunga.

¹⁸ Nyambi ya Ngula ukufulankana bakubula nyanco, kami likona lyabo ha litunga likekala mwaya myaka.

¹⁹ Kukayanda kubikati bya malwa bafwako, bakekala na byakulya bya kubakonkana ha shikati sha kapande.

²⁰ Ngoboni bakuluwa bakaloba, bamalamo ba Nyambi ya Ngula bakazimina ngonehe maluba amu lishaka, ngonehe wishe kukamoneka kami hibafwako.

²¹ Bakuluwa balombanga mikuli ngoboni kubwesha bafwako, ngoboni bakulunga bamoneshanga nceshe, na kwolola maboko na kupana.

²² Obo Nyambi ya Ngula anafwuywele bakakona litunga, ngoboni obo banakutiwi kukwendi bakatandiwamo.

²³ Nyambi ya Ngula uku wahilila na zinzila za ba kupwisha, ukutangamisha zinzila zabo nimwazo.

²⁴ Hinge ndi ba kulituntula kukawa bafwako, ndaba Nyambi ya Ngula ukabakabila na liboko lyendi.

²⁵ Nengile wamushe wuluno na kulumpala kale, ngoboni shilolo nimone bantu bakulunga banakaniwi na Nyambi ya Ngula, hinge bana babo kuya na kunyepa byakulya.

²⁶ Bikati nimwabyo bantu bakulunga bololanga maboko na kupana nahiya na kuyamiziza bamina, kami bana babo bakwikala bamfuywezi.

²⁷ Fumenu ku byabibi, pe mutende shiwahe, ngayi mukekalenga shiwahe mu litunga mwaya myaka.

²⁸ Nyambi ya Ngula wahaka kuyata shiwahe, kami kukafutamina bantu bendi bakulunga ufwako. Bakwoloka ukubakoweza mwaya myaka, ngoboni bana baba kuluwa bakatandiwamo.

²⁹ Bakulunga bakakona mu litunga, pe bakekalangamo mwaya myaka.

³⁰ Mazu a bantu bakulunga enga a ngana, kami bambanga bya kupwisha.

³¹ Mulao wa Nyambi uli mu mitima yabo, kami mawulu wabo kukahenutuka afwako.

³² Bantu bakuluwa ba kubenda bantu bakulunga, ba kushingashinga ngayi babazihe.

³³ Nyambi ya Ngula kuka balehela mu ngovu za bamalamo babo ufwako, hinge kwitabilisha ngayi babanyance ha kubayata.

³⁴ Tatililenu kuli Nyambi ya Ngula na kwombatala zinzila zendi, pe ukamitumbalalisha ngayi mukakone litunga, kami mukamona bakuluwa hibatandiwamo.

³⁵ Nalimukile bakuluwa obo bengile banguma, ba kulile ngonehe mitondo yayitali ya shinda mu Lembanoni.

³⁶ Ngoboni munyima oho napitileko, kaliha bekalileko kami, hinge oho nabashingashingile kaliha nabawanine.

³⁷ Penza bantu bakubula shihepwa, moneshesha bantu bakwoloka, bantu ba ku mwena bekalanga na bazukulu babengi,

³⁸ ngoboni bantu bakuluwa na bazukulyabo bakalobeshiwa nimwabo.

³⁹ Nyambi ya Ngula ukupulwisha bantu bakulunga na ku bakinga ha bikati bya makando.

⁴⁰ Nyambi ya Ngula ukubayavwa na ku balamwina, ukubalamwina kubakuluwa, na kubapulwisha ndaba ba kuholama mumwendi.