Nyimbo 35 - Libuka Lya Kuyela

Lilombelo lya kuyavwa

Lwimbo lwa Ndavita

¹ Obe Nyambi ya Ngula, luwanganisha obo bakunduwanganisha, kami lwisha obo ba kundwisha.

² Shimba likebo na sha kufwika ha kapumpo sha nzita, wize mu kunyavwa.

³ Kolobela mulinga wobe wa nzita hamo na shibanga shobe, pe ulwishe obo ba kunkonka. Nkulupishe kupulwisha kwobe.

⁴ Mwanga obo bakwezeka kunziha, bakomiwe na ku shampuliwa. Mwanga obo ba kumbeba ubashintulule, na ku baluwanganisha.

⁵ Mwanga benge ngonehe muzungu unapepuliwi na mpepo, ngonehi ba kutandiwa na lingeloyi lya Nyambi ya Ngula.

⁶ Oho lingeloyi lya Nyambi ya Ngula likabakonka, mwanga nzila yabo yishipe na kwinga ya kuhenena.

⁷ Bamanyikile kantamba, kami bakabilile wumi wami linkwina lya kunonka ngayi bankwate, kwakubula ebye nabipishile,

⁸ mwanga kuloba kwa ku bazumuna kubezilile, bakafwe mu kantamba kabo nibo bamwine, bakawe na kulobelela mu linkwina.

⁹ Niho moyo wami ukatangala muli Nyambi ya Ngula, nikawahilila mu kulamwina kwendi.

¹⁰ Nikawahilila na mutima wami nimwawo na kwamba ngayi, “Kati yani wakulifweka na nobe Nyambi ya Ngula? Ukulamwina ba kupopa, kuli aba banabapitakana ku ngovu. Bakuyanda na ba kushepwa kuli aba ba kubapukula.”

¹¹ Bantu bababi ba kupaka bya mahalo hahami, ha milandu eye nabulu kulimuka.

¹² Bakubweshela byabibi ku byabiwahe, kami moyo wami uli mu wunginga.

¹³ Ngoboni oho bamalamo bami bakolele, navwalile bincancolo ku monesha malila, nazilile byakulya, nalombelele, mutwe wami hinga wanyongamina hanci.

¹⁴ Ngo ngayi bahoni bami hinge bawushinda wami. Nalinyongaminine mu malila, ngonehe muntu ukulila mandiyendi.

¹⁵ Ngoboni oho nekalile mu makando, nimwabo batangalile pe bakungulukilile kukwami na kundwisha. Aba bayeni batwalilileho kunkama.

¹⁶ Bantu bankendwile na nzimbo, ngonehi bantu ba kukumangiza wakupenga.

¹⁷ Obe Nyambi ya Ngula, shikati sha kukuma hati ukapenzelela? Ndamwine ku mangunga wabo, pulwisha wumi wami ku naba babimbwi.

¹⁸ Nikakukambilila mu shikungulukilo shashinene sha bantu bobe, nika kuyemeza kumbili ya likunge.

¹⁹ Hinga witabila ngayi bamalamo bami ba mahalo, ku wahilila ha kukomiwa kwami. Hinga witabila obo banzimba kuli nyantiza na meho, mu ku wahilila ndaba ya wunginga wami.

²⁰ Bafwako kwamba bya ku mwena, ngoboni bayongolanga bya kubangila bya mahalo, aba ba kuleta bya ku mwena mu litunga.

²¹ Bamalamo bami bana kumbangila na kubilikiza ngayi, “Ehee. Twamonene ebye watendele.”

²² Obe Nyambi ya Ngula, unalimonene ebye bikutendiwa, hinga umwena, pe hinga wikala kwakutali na nami.

²³ Pinduka. Katuka pe undwile, Obe Nyambi yami na Mwene yami.

²⁴ Obe Nyambi ya Ngula, uli wakulunga, pe haya mbilike ngayi mulandu nifwao. Hinga witabila ngayi bamalamo bami batangale hahami.

²⁵ Hinga ubaleha balyambishe nibo bamwine ngayi, “Ehee. Twamumanishakale. Nisho bene twashinganga.”

²⁶ Mwanga ba kutangala ha kuyanda kwami bakomiwe shikuma na kubengisha lumpa. Mwanga obo bakuliyemeza ngayi babawahe kumpitakana bekale na lisheni na ku shampuka.

²⁷ Mwanga obo bakushinga ku mona ku shamba kwami bawulumwine na kutangala, ambenu na ku bokelaho kami ngayi, “Nyambi ya Ngula wenga wamunene. Ou wawahililanga ha kutumpuka kwa mukamulimo wendi.”

²⁸ Niho nikashimikila kulunga kwobe, kami nika kuyemeza matena nimwawo.