Nyimbo 33 - Libuka Lya Kuyela

Lwimbo lwa kuyemeza Nyambi

¹ Enu bantu bakulunga nimwenu, wahililenu muli Nyambi ya Ngula! Muyemezenu, enu mwamwombatalanga nimwenu.

² Kambililenu kuli Nyambi ya Ngula na tumbuli, mwimbililenu na kambuli kakanene ka kulemiwa na nyimbwa likumi.

³ Mwimbililenu lwimbo lwalupya, mbetenu kambuli na wulongo, kami wulumwininenu tunkelenkele na ku wahilila.

⁴ Ndaba mazu a Nyambi ya Ngula akupwisha, kami milimo yendi nimwayo yatendiwa na kwoloka.

⁵ Nyambi ya Ngula wahaka bya kulunga na kuyata shiwahe, shishemo shendi sha mwaya myaka shinenzala hanci.

⁶ Nyambi ya Ngula wambile pe mayilu alengiwile, Mimuni nimwayo ya lengiwile na lizu lyendi.

⁷ Wakungwile mawate nimwawo hamo, washinkililile mampunga a mawate mu makongelo.

⁸ Hanci nimwaho, tinenu Nyambi ya Ngula! Mulemekenu, enu bantu mwazika ha kaye nimwaho.

⁹ Ndaba wambile, pe kaye kalengiwile, na lizu lyendi byuma nimwabyo byamonekele.

¹⁰ Nyambi ya Ngula ukuvulanganya bifungo bya matunga, wabakanishanga kutwala biyongola byabo kumbili.

¹¹ Ngoboni bifungo bya Nyambi ya Ngula bikwikala mwaya myaka! Biyongola bya mutima wendi bikwikala, kutwala na ku mikoka nimwayo.

¹² Lili na mfuywezi litunga lili na Nyambi ya Ngula kwinga Nyambi yabo, bali na mfuywezi bantu aba anahata ngayi benge likona lyendi!

¹³ Nyambi ya Ngula ukupenza hanci hinga ekala muyilu na ku mona bantu nimwabo.

¹⁴ Oho hinga ekala ha litanda ha kupenza ha bantu nimwabo bazika hano hanci.

¹⁵ Niye wabumbile mitima yabo nimwabo, na kulimuka byuma nimwabyo ba kutenda.

¹⁶ Mwene kupuluka ndaba ya wingi wa banzita bendi bangovu ufwako, kanzita kukoma ndaba ya ngovu zendi ufwako.

¹⁷ Bambishi banzita banengi bakubula kuyavwa kulumbeza kukukoma, nyala zabo zazinene kulamwina zifwako.

¹⁸ Meho a Nyambi ya Ngula akupenza hahabo obo ba kumutina, obo bakukulupila mu shishemo shendi sha mwaya myaka,

¹⁹ ngayi mwanga alamwine wumi wabo ku lufu, pe abayoyeshe shikati sha kapande.

²⁰ Myoyo yetu yikuzengamina hali Nyambi ya Ngula, mu kutulama na kutuyavwa.

²¹ Mitima yetu yiku wahilila, ndaba tukukulupila mu lizina lyendi lya kuyela.

²² Obe Nyambi ya Ngula, shishemo shobe sha mwaya myaka mwanga shikale nanetu, ngonehe shiya tukulumbeza mumwobe.