Nyimbo 32 - Libuka Lya Kuyela

Kulitabila na kuyatiwila

Lwimbo lwa Ndavita

¹ Bali na mfuywezi aba Nyambi akuyatila milandu yabo, aba wubi wabo unafwikiwi.

² Uli na mfuywezi muntu ou, Nyambi ya Ngula a kubula ku labila wubi, ou mu moyo wendi mowa kwongeza.

³ Oho nabulile kuliyitabila wubi wami, lutu lwami lwanangile na kwonzela ku shunga matena nimwawo.

⁴ Obe Nyambi ya Ngula, liboko lyobe lyandemenene mwaana na wushiku, pe nyala zami zamanine shikuma, ngonehe mvunyenye yinayumu na ntukumina ya mayinza.

⁵ Niho naliyitabilile wubi wami kukwobe, kaliha naholekele milandu yami. Nahanganikile nehe ngayi, “Nikaliyitabila Kubipisha kwami kuli Nyambi ya Ngula,” Niho wanyatilile wubi wami nimwawo.

⁶ Nohobene bantu bobe nimwabo bakwoloka balombelenga kukwobe, ha bikati bya kubula. Oho libazi lyalinene lya makando likeza na ku bahenyena, kukakuma kukwabo lifwako.

⁷ Obe shiholamino shami, ukandamwina ku makando. Nikwimbila na kukatula ku lizu ha bya kulamwina kwobe, ndaba unandama.

⁸ Nyambi ya Ngula ngayi, “Nikaku longesha na kukufundiziza nzila wafwanina kwendamo. Nikakubela na kukupenzeshesha.

⁹ Hinga winga wakuyeba ngonehe mbishi hinge limbema, ou nafwanini kufwomoniwa na shikongo hinge na lumingo ngayi ombatale.”

¹⁰ Bakuluwa bafwanina kuyanda, ngoboni muntu ukukulupila muli Nyambi ya Ngula, wakingiwanga na shishemo sha mwaya myaka.

¹¹ Wahililenu na kutangala, enu bakulunga, ndaba yanebye Nyambi ya Ngula anamitendele. Enu bakulunga nimwenu wulumwinenu tunkelenkele.