Nyimbo 31 - Libuka Lya Kuyela

Lilombelo lya kukulupila kuli Nyambi

Ku mukakwimbilisha. Lwimbo lwa Ndavita

¹ Obe Nyambi ya Ngula, mu mwobe nimo ni kuholama, hinga witabila ngayi niyuvwe lisheni. Nyambi wa kulunga, nikulomba ngayi, undamwine.

² Tengekela litu lyobe kukwami, haya ndamwine sha wangu. Winge limanya lya kuholamina, na shipata shami sha ku mpulwisha.

³ Mwa shikuma, Obe uli limanya na shipata shami, ndaba ya lizina lyobe ntwaminine na ku monesha nzila.

⁴ Ncobole lunyimbwa luya banamanyiki, ndaba Obe shiholamino shami.

⁵ Ni kupana moyo wami mu maboko wobe. Obe Nyambi ya Ngula, u na nkulizi, Obe Nyambi wa kwoloka.

⁶ Nyambi ya Ngula walizimba nanobo bakulemesha tunankishi, ngoboni ami nikukulupila mumwendi.

⁷ Nikawahilila na kutangala, ndaba ya shishemo shobe, unamono kuyanda kwami, ukulimuka makando wami.

⁸ Kundehelela ku maboko a bamalamo bami ngayi bankwate ufwako, unampana kulyendela oku nikushinga nimwako.

⁹ Obe Nyambi ya Ngula, nyuvwileko nceshe, ndaba nili mu makando akulila kwakunene kunakabalalishi meho wami, nahopoko mu lutu shikuma.

¹⁰ Wumi wami unapopo ndaba ya wunginga, na kulila kwami kunepihishi wumi wami. Napopo shikuma ndaba ya milandu yami, kami bifupa byami binananga.

¹¹ Bamalamo bami nimwabo bakuhandula, shinene bandambo bami. Obo bandimuka ba kuntina, oho bakuhangana mu nzila bakunyituka.

¹² Bantu nimwabo bananvwulama, ngo nafwakale. Nafutuku kwinga ngonehe nyungu ya lima ya kupabuka.

¹³ Nayuvwu bamalamo babengi bali na kuyebetela, mutentu unazinguluku nimwako. Bali na ku shingishisha nzila ya kundwisha, ba kumbeba ngayi banzihe.

¹⁴ Obe Nyambi ya Ngula, ngoboni nikukulupila kukwobe, pe nikwamba ngayi, “Obe Nyambi yami.”

¹⁵ Matena ami ali mu maboko wobe, ndamwine ku maboko a bamalamo bami na kunobo ba kunyandisha.

¹⁶ Tilamina hali mukamulimo wobe na ku wahilila, ndamwine mu shishemo shobe,

¹⁷ Obe Nyambi ya Ngula, ndaba nikwihana kukwobe, pe hinga witabila ngayi niyuvwe lisheni. Mwanga bakuluwa bayuvwe lisheni, mwanga baye na wumumu mu kalunga.

¹⁸ Mwenesha zindimi za bakamahalo, aba bakwamba bya kuliyemeza na kulilundumika, bakwamba na lihandu ha bantu bakulunga.

¹⁹ Obe Nyambi ya Ngula, eshe byakomokesha byuma byabiwahe unakowezele obo ba kukutina. Bantu nimwabo balimuka eshe wawaha, eshe wakinganga aba ba kuholama mumwobe.

²⁰ Ukubakoweza ku lubeta lwa bantu mu kampenci ka ku meho wobe. Wabalamine shiwahe mu munkungwa wobe ku lihandu lya bamalamo babo.

²¹ Obe Nyambi ya Ngula, uyemeziwe, Wamoneshele shishemo shobe hahami, oho bamalamo banzingulukile na kundwisha.

²² Natinine, pe nambile ngayi, “Unantanda ku meho wendi.” Ngoboni wayuvwile kulila kwami, oho nalililile kukwobe ngayi unyavwe.

²³ Enu bantu bendi nimwenu ba kuyela, hakenu Nyambi ya Ngula. Nyambi ya Ngula ukulama bantu bakwoloka, ngoboni ukushushula bakuliyemeza kuya ngo ku ntendelo yabo.

²⁴ Shumenu, pe mitima yenu yinge ya kukanca, enu nimwenu mu kulumbeza muli Nyambi ya Ngula.