Nyimbo 30 - Libuka Lya Kuyela

Lilombelo lya kukambilila

Lwimbo lwa Ndavita lwa kufungwila Litala lya Nyambi ya Ngula

¹ Obe Nyambi ya Ngula, nika kuyemeza, ndaba wandamwinine mu makando, kami kaliha wetabilile bamalamo bami batangalile hahami.

² Obe Nyambi ya Ngula, Nyambi yami, nabilikizile kukwobe ngayi unyavwe pe wanyongomanishile.

³ Obe Nyambi ya Ngula, obe wafumishile moyo wami mu kalunga ka bafu. Nashingile kuya mu shizimbi, ngoboni wabweshele wumi wami.

⁴ Yimbilenu nyimbo za kuyemeza Nyambi ya Ngula, enu bantu bendi bakwoloka! Muyemezenu ndaba ya lizina lyendi lya kuyela.

⁵ Kupilama kwendi kwa shikati shashishe, kuyamiziza kwendi kwenga kwa shikati nimwasho sha kuyoya. Mihozi yikupulumuka wushiku nimwawo, ngoboni ku lumenemene kukwiza ku wahilila.

⁶ Ngoboni ami, oho byuma byanyendelele shiwahe, nalyambashanine ngayi, “Nifwako kuka kanka.”

⁷ Obe Nyambi ya Ngula, mu kuyamiziza kwobe, wancumishile ngo lipili lya ku shuma. Obe waholekele lupala lwobe kukwami, pe ami natinine.

⁸ Obe Nyambi ya Ngula nalililile kukwobe, pe nanyepele kuyamiziza kwobe,

⁹ “Ukawanaho bishini ha lufu lwami? Kati nkambiko ngani ukuwana ndi nikuya mu kalunga? Bakufwa kati ba kutwesha kukuyemeza ndi? Kati ba kutwesha kutoya kwoloka kwobe kwakubula kumana ndi?

¹⁰ Nyuvwe, Obe Nyambi ya Ngula, na kunyuvwila nceshe! Nyavwe, Obe Nyambi ya Ngula!”

¹¹ Unafutulu kuhomba kwami mu kutangala kwa ku shinda, unafumishi wunginga wami, unamfwiki kutangalala.

¹² Niho moyo wami kukamwena ufwako, nikayimbila kukwobe nyimbo za ku yemeza. Obe Nyambi ya Ngula, Nyambi yami, nikakwimbilila mwaya myaka.