Nyimbo 29 - Libuka Lya Kuyela

Lizu lya Nyambi ya Ngula mu mushika

Lwimbo lwa Ndavita

¹ Yemezenu Nyambi ya Ngula, enu mwekala muyilu, yemezenu wuwahe na ngovu za Nyambi ya Ngula.

² Yemezenu wuwahe wa lizina lya Nyambi ya Ngula, lemeshenu Nyambi ya Ngula, kukubyazima kwa wuwahe wendi.

³ Lizu lya Nyambi ya Ngula linayuvwaniki ha mema, Nyambi wawuwahe ukuvuma, lizu lyendi likuvuma ha mema amengi.

⁴ Lizu lya Nyambi ya Ngula lya ngovu shikuma, lizu lya Nyambi ya Ngula lya maleema.

⁵ Lizu lya Nyambi ya Ngula, likutabula bitondo bya shinda, Nyambi ya Ngula ukutabozola bitondo bya shinda bya mu Lembanoni.

⁶ Ukukilokesha mapili a Lembanoni ngonehe namani, na lipili lya Helimoni ngonehe mwana ngombe ya lishaka.

⁷ Lizu lya Nyambi ya Ngula, likulashekesha milangi ya mundilo.

⁸ Lizu lya Nyambi ya Ngula likukankisha libelelengwa, Nyambi ya Ngula ukukankisha libelelengwa lya Kandeshi.

⁹ Lizu lya Nyambi ya Ngula likukankisha bitondo bya oka, na kupulumuna mabizi wabyo, oho muntu nimwendi mu litala lyendi ukabilika ngayi, “Wuwahe.”

¹⁰ Nyambi ya Ngula wekala ha litanda na kulela mampunga a mema, hinga enga mwene mwaya myaka.

¹¹ Nyambi ya Ngula apane nyala ku bantu bendi, afwuywele bantu bendi na kubapana ku mwena.