Nyimbo 28 - Libuka Lya Kuyela

Lilombelo lya kuyavwa

Lwimbo lwa Ndavita

¹ Obe Nyambi ya Ngula, nikwihana, Obe limanya lyami, hinga uzika matu kukwami. Ku mona tuhu ndi kunkumbula ufwako, pe nikekala hakati ka nobo bakuya hanci mu kalunga.

² Nyuvwe oho nikulilila kukwobe ngayi unyavwe, oho nikakatwila maboko wami na kuwapenzesha ku Litala lyobe lya kuyela.

³ Hinga umpana mulandu kuma kumo na baka Kubipisha, nanobo ba kutenda byabibi, bantu aba ba kutobalisha mazu wabo, ngoboni mu mitima yabo munenzala nzimbo.

⁴ Bashushule kuya nanebye banatende, kuya ngo kuntendelo yabo ya byabibi. Bashushule kuya ngo ku milimo ya maboko wabo.

⁵ Kufulankana kunebye anatende Nyambi ya Ngula, hinge ku milimo ya maboko wendi bafwako, Nyambi ya Ngula ukabashushula na kubalobesha.

⁶ Nyambi ya Ngula ayemeziwe, ndaba unayuvwu kulambilila kwami.

⁷ Nyambi ya Ngula niye nyala zami na likebo lyami, mutima wami ukukulupila mumwendi. Haya nikuyavwiwa, pe mutima wami uku wahilila, nikembila lwimbo lwa kumuyemeza.

⁸ Nyambi ya Ngula niye nyala za bantu bendi, niye shipata na kulamwina mwene wendi anahata.

⁹ Obe Nyambi ya Ngula pulwisha bantu bobe, na kufwuywela ba likona lyobe. Winge mulishani wabo, na ku bafulankana mwaya myaka.