Nyimbo 27 - Libuka Lya Kuyela

Lilombelo lya kuyemeza

Lwimbo lwa Ndavita

¹ Nyambi ya Ngula niye mwaana wami na kupulwishiwa kwami, Kati yani nikafwanina kukatina? Nyambi ya Ngula niye shiholamino sha moyo wami, Kati yani nikafwanina kukatina?

² Oho bantu bababi bakankatukila na kushinga kuvwota lutu lwami, oho bamalamo bami nanaba banzimba bakandwisha, bakapukazala na kuwa.

³ Hinge ndi bakanzita babengi bananzinguluku, mutima wami kukatina ufwako. Hinge ndi banzita bakankatukila na kundwisha, hinge noho, nikakulupilanga Nyambi.

⁴ Nanyepe Nyambi ya Ngula shuma shimo, shiya tuhu nikashinga, kwikala mu Litala lya Nyambi ya Ngula shikati sha kuyoya kwami nimwasho, na ku mona wuwahe wa Nyambi ya Ngula, na kumufwatula mu Litala lyendi.

⁵ Ndaba bikati bya makando ukandama mu munkungwa wendi, ukankoweza shiwahe mu Litala lyendi, na kunkandamisha ha limanya lyalitali.

⁶ Pe nikakoma bamalamo bami bananzinguluku. Nikatupula zinkombela mu Litala lyendi na kuwulumwina tunkelenkele twa ku wahilila, nikayimbila na kuyemeza Nyambi ya Ngula!

⁷ Yuvwilila, Obe Nyambi ya Ngula, oho nikulila na kubilika, nyuvwileko nceshe pe unkumbule!

⁸ Oho wambile ngayi, “Shingashinga lupala lwami.” Niho na kumbwile ngayi, “Obe Nyambi ya Ngula lupala lwobe nilo nikushingashinga.”

⁹ Hinga uholamina! Hinga utandila mukamulimo wobe kwakutali mu kupilama. Obe wanyavwanga, hinga unyumba, hinga umfutamina, Obe Nyambi mupulwishi wami.

¹⁰ Hinge ndi batate na bamawa ba kumfutamina, ngoboni Nyambi ya Ngula ukantola.

¹¹ Obe Nyambi ya Ngula, ndongeshe ebye ukushinga ngayi nibitende, pe ntwaminine mu nzila yayiwahe, ndaba nili na bamalamo babengi.

¹² Hinga unciya ku shifungo sha bamalamo bami, aba ba kundwisha na mahalo na mafumbila.

¹³ Nakulupili ngayi nikamona byabiwahe bya Nyambi ya Ngula, mu litunga lya babomi.

¹⁴ Tatililenu kuli Nyambi ya Ngula! Shumenu na kukanca! Na kutatilila kuli Nyambi ya Ngula.