Nyimbo 25 - Libuka Lya Kuyela

Lilombelo lya kutwaminina na kukingiwa

Lwimbo lwa Ndavita

¹ Nyambi ya Ngula, kukwobe nikukumisha lilombelo lyami.

² Obe Nyambi yami, mumwobe nikukulupila. Hinga witabila ngayi bamalamo bami banyuvweshe lisheni. Hinga witabila ngayi bawahilile oho nili na kuyanda.

³ Ingoi, muntu nimwendi ukukulupila mumwobe hinga akayuvwa lisheni, ngoboni bakayuvwe lisheni aba ba kuhanganikila baminabo byabibi kwakubula mulandu.

⁴ Obe Nyambi ya Ngula, moneshe zinzila zobe, ngayi niziyuvwishishe.

⁵ Ndongeshe kuyoya omu mwaya kupwisha kwobe, ndaba Obe Nyambi mupulwisha wami. Kukwobe nikukulupila matena nimwawo.

⁶ Obe Nyambi ya Ngula, anuka nceshe zobe na shishemo shobe, eshe wamoneshelenga ku balika kushikale.

⁷ Hinga unyanukila wubi wa wundumbana wami, hinge kuluwa kwami, nyanuke ndaba ya shishemo shobe, Obe Nyambi ya Ngula, nyanuke ndaba ya wuwahe wobe.

⁸ Nyambi ya Ngula uli wamuwahe na kwoloka, uku longesha bakawubi nzila eye banafwanini kukonka.

⁹ Niye ukatwaminina ba kulilimbwilisha mu nzila ya kwoloka, na kubalongesha zinzila zendi.

¹⁰ Zinzila za Nyambi ya Ngula zenga za kwoloka na shishemo sha mwaya myaka, kukwabo ba kulama kulimama kwendi na kwombatala ndayano zendi.

¹¹ Obe Nyambi ya Ngula, ndaba ya lizina lyobe, nyatile ku wubi wami, ndaba unamvulili.

¹² Kati kuli muntu ukutina Nyambi ya Ngula ndi? Ou muntu Nyambi ya Ngula akalongesha nzila anafwanini kukonka,

¹³ matena akuyoya kwendi nimwako akenga akutangama, kami bana bendi bakakona litunga.

¹⁴ Wuhoni wa Nyambi ya Ngula unengi wa nobo ba kumutina, kami ukashumisha kulimama kwendi nabo.

¹⁵ Meho wami akanconcomeka kuli Nyambi ya Ngula, shikati nimwasho, ngayi anyavwe na ku shobolola mawulu wami mu kanyanzi.

¹⁶ Obe Nyambi ya Ngula penza kukwami, na kunyuvwila nceshe, ndaba nili ninkayami pe napopo shikuma.

¹⁷ Mfumishe mu wukalu nimwawo, pe umfumishe ku makando wami nimwawo.

¹⁸ Hanganika malwa na kuyanda kwami, pe nyatile wubi wami nimwawo.

¹⁹ Penza eshe banamvulili bamalamo bami, mona eshe bananzimbi.

²⁰ Lama wumi wami na ku ndamwina, hinga witabila ngayi banyuvwishe lisheni, ndaba nikuholama mumwobe.

²¹ Kulunga kwami na kwoloka mwanga binkoweze, ndaba nina kulupili mumwobe.

²² Obe Nyambi, kuliza bantu bobe ba Ishalela ku makando wabo nimwawo.