Nyimbo 22 - Libuka Lya Kuyela

Kulila kwa kukola na lwimbo lwa kuyemeza

Ku mukakwimbilisha. Lwimbo lwa Ndavita

¹ Nyambi yami, Nyambi yami, u na nciyili bishini? Kati ndaba ngani ukubula ku nyavwa, na kubula ku yuvwa mazu aku shunga kwami?

² Obe Nyambi yami, ku shikati sha mwaana nikulilila kukwobe, ngoboni kunkumbula ufwako. Ku shikati sha wushiku nikukulilila pe kukatala nifwako.

³ Ngoboni obe wa kuyela shikuma, ou Ishalela akuyemeza.

⁴ Batatizetu bakulupilile mu mwobe, ba kukulupilile pe wabalamwinine.

⁵ Balilililenga kukwobe, niho wabalamwinine, bakulupilile mumwobe pe kaliha wabayeneshele.

⁶ Ngoboni ami nili lipila, kaliha nili muntu, bantu ba kundimbwilisha na kunkendula.

⁷ Nimwabo ba ku mona bakuhengamina, na kunengokesha mitwe yabo.

⁸ Bakwamba ngayi, “Nka wakulupilile muli Nyambi ya Ngula, Lehenu amulamwine, ndi wamuhaka.”

⁹ Ngoboni Obe waleteshele ngayi nihemuwe. Oho nekalile mbututu, wandamine shiwahe ku mabele a bamawa.

¹⁰ Ku balika ha kuhemuwa kwami nakinka mutima hahobe, ku balika ha kuhemuwa kwami Obe uli Nyambi yami.

¹¹ Hinga wikala hahatali na nami, Makando ali hahepi, kami kowa wakunyavwa.

¹² Bamalamo babengi bananzinguluku ngonehe bankunzi. Bananzinguluku nimwabo ngonehe bankunzi babakali ba ku litunga lya Mbashani.

¹³ Banayahama mu tunwa ngonehe babimbwi, ba kumbulumina na kushinga kuncanyozola.

¹⁴ Nyala zami zinamana, ngonehe mema anayitikili hanci. Bifupa byami nimwabyo bya weyuku, mutima wami unengi ngonehe nzunzulu, yinanyangumukili mushali.

¹⁵ Mulibu wami unayuminini nehe lukungu, kami lulimi lwami luna lamatili mu lilakito. Obe unanciyi mu ndoba ngayi nifwilemo.

¹⁶ Likunge lya bantu bababi linanzinguluku, ngonehe litanga lya batuwa bakuhenyena hahami, banatanya maboko na mawulu wami.

¹⁷ Bifupa byami bili na ku moneka. Bamalamo bami ba kupenzeshesha. Baku wahilila ha ku mona ngayi na kuyanda.

¹⁸ Ba ku li tapila bivwalo byami mukati kabo, na ku kuna nyela ha mukanjo wami.

¹⁹ Obe Nyambi ya Ngula hinga uyikala hahatali na nami. Nyankupa wize undamwine.

²⁰ Lamwina moyo wami ku mukwale. Lamwina wumi wami ku ngovu za batuwa.

²¹ Ndamwine ku tunwa twa babimbwi, ngovu hinifwazo, kumbili ya nobo zingombe ba lishaka.

²² Ni ka tongweza bawushinda wami bya lizina lyobe, nika kuyemeza mu bikungulukilo byabo.

²³ Nikamba ngayi, “Enu bakakutina ya Nyambi ya Ngula, yemezenu. Enu bazukulya Yakobo mulemekenu, enu bantu ba Ishalela, mulemeshenu.

²⁴ Nyambi ya Ngula kukenda ba kushepwa hinge kulimbulula kuyanda kwabo ufwako, ku bakweshozoka ufwako, ngoboni oho bakwihana ngayi bayavwiwe ukukumbula.”

²⁵ Obe Nyambi ya Ngula, mu shikungulukilo shashinene nika kuyemeza hanebye unatende, ku meho anobo ba kukutina nikatupula nkombela na kulupishile.

²⁶ Batuyande bakalya na kwikuta, aba bakwiza kuli Nyambi ya Ngula bakamuyemeza. Mwanga bakayoye mwaya myaka.

²⁷ Mikoka nimwayo ya hanci bakanuka na kutengulukila kuli Nyambi ya Ngula, mapashi amu matunga nimwao akamulemesha.

²⁸ Kulela kwenga kwa Nyambi ya Ngula, niye ukulela matunga nimwawo.

²⁹ Bakakuliyemeza nimwabo baka mu shinkamina. Bantu nimwabo ba kukunkulukila ku kalunga bakashintama, na naba bakubula kuliyoyesha nibo bamwine.

³⁰ Bihemunwino bya kumbili bikatendela milimo Nyambi, bantu bakashimikila byendi ku bihemunwino bya kumbili.

³¹ Bakashimikila bya kupulwisha kwendi, ku mukoka ushili kumbili, bakamba ngayi, “Mwene wapulwishile bantu bendi.”