Nyimbo 21 - Libuka Lya Kuyela

Kuyemeza kwa kukoma

Ku mukakwimbilisha. Lwimbo lwa Ndavita

¹ Obe Nyambi ya Ngula, mwene uku wahilila ndaba ya ngovu zobe, uku wahilila ndaba unamupana kukona.

² Obe wunamupana ebye washinga mutima wendi, unakumbulu malombelo wendi.

³ Wezile kukwendi na mfuywezi zazinene, kami wayakile munana wa ngolinde ha mutwe wendi.

⁴ Wanyepele wumi kukwobe, pe wamupanine kuyoya mwaya myaka.

⁵ Ndaba unamuyavwa, maleema wendi amanene. Una mu tumbalalishi na kumunenehesha.

⁶ Mfuywezi zobe zili hahendi mwaya myaka, unamuletele kutangala ha ku mona lupala lwobe.

⁷ Mwene ukukulupila muli Nyambi ya Ngula, ndaba ya shishemo sha mwaya myaka sha Wakukangana kukahenyeshiwa shifwako.

⁸ Liboko lya mwene lika kwata bamalamo bendi nimwabo, liboko lyendi lya shilyo likakona nimwabo bamuzimba.

⁹ Oho ukamoneka ukabalobesha ngonehe mundilo wamu ngaanze. Nyambi ya Ngula ukabamina mu wukali wendi, pe mundilo wendi uka balobesha.

¹⁰ Kowa muzukulu ukashalaho hano hanci, mwene ukabaziha nimwabo.

¹¹ Hinge ndi ba kuyongola byabibi bya kukulwisha, ngoboni kukatwesha bafwako.

¹² Ukabashintulula lubilo, oho ukanana mivwi kukwabo.

¹³ Uyemeziwe obe Nyambi ya Ngula, ndaba ya nyala zobe. Tukembila na kuyemeza ngovu zobe.