Nyimbo 20 - Libuka Lya Kuyela

Malombelo akukona

Ku mukakwimbilisha. Lwimbo lwa Ndavita

¹ Nyambi ya Ngula mwanga akuyavwe oho uli mu makando. Lizina lya Nyambi wa Yakobo mwanga likukinge.

² Mwanga akutumine bya ku kuyavwa bya kufuma ku litala lyendi, na bya ku kushumisha bya kufuma ku Ziyoni.

³ Mwanga anuke zintupu zobe nimwazo, kami atambule zinkombela zobe nimwazo.

⁴ Mwanga akupane ebye washinga mutima wobe, na kwinzalishilila bihanganiko byobe nimwabyo.

⁵ Pe tuka wulumwina na kutangala oho ukakoma, tukazika zindembela mu lizina lya Nyambi yetu. Mwanga Nyambi ya Ngula akupane ebye nimwabyo ukunyepa.

⁶ Haya nikulimuka ngayi Nyambi ya Ngula, ukayavwa wakuwabishiwa wendi, uku mu kumbula mu liyilu lyendi lya kuyela, na ngovu zendi zazinene, za liboko lyendi lya shilyo ukumukomesha.

⁷ Bamo bakuliyemeza mu makoloyi wabo a nzita, bamina mu bambishi babo, ngoboni etu tukuliyemeza, mu lizina lya Nyambi ya Ngula Nyambi yetu.

⁸ Bantu banehe ba kupukazala na kuwila hanci, ngoboni etu tukapinduka na kwimana hinga twashuma.

⁹ Obe Nyambi ya Ngula, pana kukona kuli mwene, tukumbule oho tukwihana.