Nyimbo 18 - Libuka Lya Kuyela

Lwimbo lwa Ndavita lwa kukona

Ku mukakwimbilisha nyimbo. Lwimbo lwa Ndavita mukamulimo wa Nyambi ya Ngula

¹ Obe Nyambi ya Ngula na ku haka, Obe nyala zami.

² Nyambi ya Ngula niye limanya lyami na shipata shami sha ku shuma na mulamwini wami. Nyambi yami niye limanya lyami, mumwendi nimo ni kuholama, niye likebo lyami, uku ndamwina na ku nyinkalika shiwahe.

³ Ni kwihana kuli Nyambi ya Ngula, ou nafwanini ku yemeziwa, pe ukumpulwisha ku bamalamo bami.

⁴ Mankanyi a lufu anzingulukile, mankanyi akunongesha amfwikile.

⁵ Malamo a lufu anzingulukile, pe kantamba ka lufu, ka nkwatile.

⁶ Mu makalikiza wami nehanine Nyambi ya Ngula, nehanine Nyambi yami ngayi anyavwe. Mu litala lyendi wayuvwile lizu lyami, wayuvwilile kuku bilika kwami, kwakushinga ku yavwiwa.

⁷ Niho hanci hakankile pe hanyenkanine, mimbi ya mapili ya kankile na ku nyenkana, ndaba Nyambi wapilamine.

⁸ Wishe watutumine kufuma mu mizulu yendi, mulangi wa ku nongesha wafumine mu kanwa kendi, mashanga akubanga afumine kukwendi.

⁹ Watabwile mbimbayilu na kuyipita hakati pe wezile hanci, hamo na likumbi lya ku shipa lyekalile mu nceto ya mawulu wendi.

¹⁰ Wekalile ha makelumbi na ku lelenteka, watukile ha mbando za mpepo.

¹¹ Walifwikile niyemwine na mincimpwe, makumbi akushipa a mvula amuzingulukile.

¹² Ku mbyazeka na ku mwesha ngonehe mundilo byekalile kumbili yendi, byapitile mukati ka makumbi akushipa.

¹³ Nyambi ya Ngula watendokele muyilu ngonehe mushika. Lizu lya Wakukangana lya yuvwanikile.

¹⁴ Wapuhile mivwi yendi, pe wapanzanishile bamalamo bendi, wa batandile na ku mwesha kwendi.

¹⁵ Obe Nyambi ya Ngula oho wakalihilile bamalamo bobe na kufwoma kwobe, nceto ya liwate ya shalile ha too, pe mimbi ya hanci ya fwikulukile. Oho Nyambi ya Ngula akalihilile bamalamo bendi, pe wa ba hashokelele na wukali.

¹⁶ Nyambi ya Ngula wa nkolobelele hanci kufuma mu yilu, pe wa nkokele ku mfumisha mu mampunga.

¹⁷ Wa ndamwinine ku bamalamo bami bangovu, na ku kwabo nimwabo baya banzimbile, ndaba bengile bangovu ku mpitakana.

¹⁸ Oho nekalile mu makalikiza, bandwishile, ngoboni Nyambi ya Ngula wankingile.

¹⁹ Wantwamininine ku mwanya waku mwena, wampulwishile ndaba wangwahililile.

²⁰ Nyambi ya Ngula ukumpana ncuungu, ndaba ya kulunga kwami, uku mfuywela ndaba kaliha nekalile na mulandu.

²¹ Ninombatala zinzila za Nyambi ya Ngula, shilolo nifume kuli Nyambi yami na kukonka byabibi.

²² Ninalama mazu wendi nimwawo, shilolo nilimbulule ndayano zendi.

²³ Na shamba kukwendi, ndaba nalilamanga amimwine, na kubula kutenda byabibi.

²⁴ Nyambi ya Ngula ukumpana ncuungu ndaba nengi wa kulunga, Halimuka ngayi nili wa kubula mulandu.

²⁵ Obe Nyambi ya Ngula, uli wa kwoloka, ku baya bakwinga bakwoloka kukwobe, pe na kwinga wa mu wahe, ku baya bakwinga babawahe.

²⁶ Walimonekeshanga kuyela ku baya ba kuliyelesha nibo bamwine, ngoboni uli wamukalu ku baya bakuluwa.

²⁷ Wapulwishanga baya ba ku li shepesha, ngoboni uku shepesha baya bakuliyemeza.

²⁸ Obe Nyambi ya Ngula, ukubangiza lambi yami, Obe Nyambi yami, ukumunika mu mincimpwe yami.

²⁹ Ukumpana nyala za ku lwisha bamalamo bami, na ngovu za Nyambi ni ku twesha ku kiluka twimbi twabo.

³⁰ Ou Nyambi, ntendelo yendi eshe ya waha na mazu wendi eshe a lubuluka. Unafweke ngonehe likebo, ku nimwabo baya bakushinga kuholama kwendi.

³¹ Nyambi ya Ngula ninkayendi niye Nyambi, Nyambi ninkayendi niye limanya lyetu.

³² Nyambi niye wampananga nyala, u na botopeshe nzila yami.

³³ Wa lyatishanga mawulu wami shiwahe, ngonehe mawulu a shineke, wa ntwesheshanga kwenda shiwahe ha mapili.

³⁴ Niye wa ndongeshanga bya ku lwa nzita, ngayi nitweshe ku nana shipando sha mukunzi sha ku shuma shikuma sha lubemba.

³⁵ Obe Nyambi ya Ngula, ukunkoweza na ku mpulwisha, kuyavwa kwobe ku na nkatulu shikuma.

³⁶ Obe u na ndama mu kubula ku kwatiwa, pe mawulu wami hinga atanga ku henutuka.

³⁷ Natandile bamalamo bami na kubakwata, pe kaliha na shintulukile hantu noho na balobeshele.

³⁸ Nabahubile hanci, pe kaliha batweshele ku pindukamo, ba ku wila ku mawulu wami hinga bakomiwa.

³⁹ Wampanine nyala za ku lwa nzita, na ku koma bamalamo bami.

⁴⁰ Watandile bamalamo bami kufuma kukwami, na kulobesha baya banzimbile.

⁴¹ Bakalokele ku shinga ku yavwiwa, ngoboni muntu wa kubapulwisha kowa, bakwihana kuli Nyambi ya Ngula, ngoboni ku ba kumbula wufwako.

⁴² Na ba cancwele, pe bafutukile ngonehe lukungu lu ku pepuka na mpepo. Na ba lyatangilile ngonehe ntiti ya mu nzila.

⁴³ Wampulwishile ku bantu ba mfutukililemo, kami wanyakile kwinga kalela ka matunga, pe bantu nabulile kulimuka haya bengakale bakamilimo bami.

⁴⁴ Oho banyuvwile, banyombatalile, mapukwenda balambile kukwami.

⁴⁵ Mapukwenda batampwile, pe bafumine ku bipata byabo hibakanka.

⁴⁶ Nyambi ya Ngula wayoya! Liyemeziwe Limanya lyami! Shimikilenu wunene wa ngovu za Nyambi, ou muka ku mpulwisha.

⁴⁷ Nyambi niye wampanine kukoma bamalamo bami, muka ku bombesha matunga mu nceto yami

⁴⁸ na ku mpulwisha ku bamalamo bami. Wankatwile ha bamalamo bami, na ku ndamwina ku bantu ba mishunga.

⁴⁹ Nohobene, Obe Nyambi ya Ngula, haya ni kuku yemeza hakati ka matunga. Ni kwimbila nyimbo za kuku yemeza.

⁵⁰ Nyambi mu ka ku pana ku koma kwakunene kuli mwene yendi, mu ka ku monesha shishemo shendi sha mwaya myaka kuli owe ana wabishi, kuli Ndavita na bazukulyendi mwaya myaka.