Nyimbo 16 - Libuka Lya Kuyela

Lilombelo lya kukulupila

Lwimbo lwa Ndavita

¹ Obe Nyambi, nkoweze, ndaba mumwobe nimo nikuholama.

² Nikwamba kuli Nyambi ya Ngula ngayi, “Obe uli Mwene yami, byuma nimwabyo byabiwahe nili na byo bikufuma kukwobe.”

³ Bantu ba kuyela mitima bali mu litunga, benga babalemu, ku wahilila kwami kwakunene kuli mumwabo.

⁴ Obo bakwitukila ku banyambi bashenge, ba kuliletela makando amengi nibo bamwine. Ku zinkombela zabo za mukeza kuka kundamako nifwako, ku banyambi babo kukalemeshako nifwako.

⁵ Nyambi ya Ngula, Obe likona lyami, nkomoki yami ya mfuywezi, ukulama nimwabyo ebi binengi byami.

⁶ Zingiza zami zinatabuliwi mu zimbalila zaziwahe, mwa shikuma nili na likona lyaliwahe!

⁷ Nikuyemeza Nyambi ya Ngula, ndaba niye mukakumbela, kami shikati sha wushiku mutima wami ukumfundiziza.

⁸ Na twamikanga Nyambi ya Ngula shikati nimwasho ku mbili yami. Kowa shuma nikulikekula, ndaba uli ku liboko lyami lya shilyo.

⁹ Nohobene mutima wami ukutangala, moyo wami ukawahilila shikuma, kami lutu lwami lukwikala shiwahe.

¹⁰ Ndaba kuka lehela moyo wami mu kalunga ka bafu wufwako. Hinga kuka lehela wakwoloka wobe ngayi abole wufwako.

¹¹ Obe u ka monesha nzila yikuya ku wumi, kwikala hamo nanobe kukenzalisha mutima wami na ku tangala. Ku liboko lyobe lya shilyo kuli bya ku wahilisha mwaya myaka.