Nyimbo 148 - Libuka Lya Kuyela

Byalengiwa nimwabyo biyemeze Nyambi

¹ Yemezenu Nyambi ya Ngula! Yemezenu Nyambi ya Ngula enu mwekala mu mayilu, muyemezenu mumbimbayilu!

² Muyemezenu, enu mangeloyi wendi nimwenu, muyemezenu, enu makunge wendi a nzita ya muyilu nimwawo!

³ Muyemezenu, enu mutena na ngonda, muyemezenu, enu nyenye nimwazo za kubyazima!

⁴ Muyemezenu, enu mayilu a mayilu, na nenu mema ali hayilu ya mbimbayilu!

⁵ Nimwabyo biyemeze lizina lya Nyambi ya Ngula! Ndaba niye watumizile, pe byalengiwile.

⁶ Wabiyakile mu myanya yabyo mwaya myaka, kami bifwako kutwesha kukiluka zinginza zabyo.

⁷ Yemezenu Nyambi ya Ngula hanci nimwaho, enu bilengwalengwa bya mu liwate na nenu mampunga nimwenu,

⁸ enu kumwesha na likandavula, makelengo na mbundu, na nkuli yikwombatala ndayano zendi!

⁹ Muyemezenu, enu mapili na binkanda nimwenu, enu mitondo ya mikabo na mitondo ya Shinda nimwayo,

¹⁰ enu tuyamana twa kulela na twa mu lishaka nimwato, enu bibumbwabumbwa bya kulikoka na mavumo na tuyoni!

¹¹ Muyemezenu, enu bamyene ba hano hanci na matunga nimwawo, babilolo na batulela nimwabo ba hanci,

¹² enu bandumbana na batunkanga, enu tukulukazi na batwanuke!

¹³ Nimwabo bayemeze lizina lya Nyambi ya Ngula, ndaba lizina lyendi niye ninkayendi lyalinene shikuma, kupitakana mazina nimwawo. Wuwahe wendi uli hayilu ya hanci na liyilu.

¹⁴ Niye washumishile bantu bendi, wapanine bantu bendi ba kuyela mitima lwimbo lwa kuyemeza, ku Baishalela bantu aba ahaka. Yemezenu Nyambi ya Ngula!