Nyimbo 147 - Libuka Lya Kuyela

Kuyemeza Nyambi wa ngovu nimwazo

¹ Yemezenu Nyambi ya Ngula! Ndaba sha shiwahe kwimbila nyimbo za kuyemeza Nyambi yetu, shinengi sha shiwahe kumuyemeza ndaba shikuwahilisha.

² Nyambi ya Ngula ukutendulula Yelushalema, na kubwesha Baishalela bayile mu wuntapwa.

³ Ukunyongomanisha ba kupokoka mitima, na kumanga bitombo byabo.

⁴ Walimuka wingi wa nyenye, kami wazihananga ha mazina wazo.

⁵ Mwene wetu wamunene shikuma, na ngovu nimwazo, kami ngana zendi kutwesha kufwanikiziwa zifwako.

⁶ Nyambi ya Ngula wayavwanga ba kulilimbwilisha, ngoboni wawishanga hanci bakuluwa.

⁷ Yimbilenu nyimbo za kukambilila Nyambi ya Ngula, yimbilenu nyimbo kuli Nyambi yetu na mushumina wa kambuli.

⁸ Wafwikanga mayilu na makumbi, walokeshanga mvula hanci, na kumenesha mwila ha mapili.

⁹ Wapananga tuyamana byakulya, na kulisha bana ba makwangala oho ba kulila.

¹⁰ Kaliha wawahililanga mu nyala za bambishi, hinge mu banzita babahehu ku mawulu.

¹¹ Ngoboni Nyambi ya Ngula wawahililanga na bantu ba kumutina aba ba kulumbeza mu shishemo shendi sha mwaya myaka.

¹² Yemeza Nyambi ya Ngula, obe Yelushalema! Yemeza Nyambi yobe, obe Ziyoni!

¹³ Washumishanga tupatisho twa mapangati obe, na kufuywela bantu bobe bali mukatikobe.

¹⁴ Walamanga zingiza zobe shiwahe, na ku kukonkanisha na loto lwa lu wahe.

¹⁵ Wapananga ndayano zendi hanci, kami lizu lyendi lyendanga shawangu.

¹⁶ Watandubulanga makelengo ngo muyemba, na kufukumuna likandavula ngo lukungu.

¹⁷ Walokeshanga likandavula. Kati yani ukutwesha ku shumina mashika atumanga?

¹⁸ Amba tuhu, bikunyangumuka nimwabyo kwinga mema, wapepokeshanga mpepo yendi, pe mema akukunkula.

¹⁹ Unahololo lizu lyendi kuli Yakobo, unapana ndayano zendi na mazu wendi kuli Ishalela.

²⁰ Kaliha watendele ebye ku matunga amina, pe nibo kulimuka ndayano zendi bafwako. Yemezenu Nyambi ya Ngula!