Nyimbo 146 - Libuka Lya Kuyela

Lwimbo lwa kuyemeza Nyambi Mupulwishi

¹ Yemezenu Nyambi ya Ngula! Yemeza Nyambi ya Ngula, obe moyo wami!

² Nikamuyemeza aha nishili kuyoya, nikembila kuli Nyambi yami mu kuyoya kwami nimwako.

³ Hinga ukulupila mu bana ba bamyene babalume, mu muntu, ou mumwendi mowa kuyavwiwa.

⁴ Oho ba kufwa ba kuboka kulukungu, ha mutena uyo biyongola byabo nimwabyo binamana.

⁵ Uli na mfuywezi muntu ou ukuyavwiwa na Nyambi wa Yakobo, ou kulumbeza kwendi kuli muli Nyambi ya Ngula, Nyambi yendi,

⁶ Ou walengele liyilu na hanci, na liwate na biya bilimo nimwabyo. Ukulama kwoloka kwendi mwaya myaka.

⁷ Wayatanga bakuyandishiwa mu kupwisha, wapananga byakulya ku bakanzala. Nyambi ya Ngula washobolanga batuyili.

⁸ Nyambi ya Ngula watoneshanga meho a tushishitwa. Nyambi ya Ngula wakatulanga aba banalemenene, Nyambi ya Ngula wahaka bakulunga.

⁹ Nyambi ya Ngula walamanga mapukwenda, wayavwanga bamfwile na banginga, ngoboni waluwanganishanga biyongola bya bakuluwa.

¹⁰ Nyambi ya Ngula ukulela mwaya myaka, Nyambi yobe, obe Ziyoni, ukulela ku mukoka nimwayo. Yemezenu Nyambi ya Ngula!