Nyimbo 145 - Libuka Lya Kuyela

Lwimbo lwa kuyemeza

Lwimbo lwa kuyemeza lwa Ndavita

¹ Nikabilika wunene wobe, Obe Nyambi yami, Mwene yami, nikakambilila ha lizina lyobe mwaya myaka.

² Nikakukambilila ha mutena ha mutena, na kuyemeza lizina lyobe mwaya myaka.

³ Nyambi ya Ngula wamunene, uku fwanina kuyemeziwa shikuma, wunene wendi wakupitakana shikuma, kami shashikalu ku yuvwishisha.

⁴ Ebye unatende bikayemeziwa kufuma ku mukoka umo kutwala naku wamina, na ku shimikila milimo yobe yayinene.

⁵ Bakabilika bya wuwahe na maleema wobe, pe nikalibelula ha ntendelo yobe ya kukomokesha.

⁶ Bantu bakashimikila milimo yobe ya ngovu, pe nami kami nikabilika wunene wobe.

⁷ Bakashimikila bya mpupo ya wuwahe wobe nimwawo, na kwimbila bya kulunga kwobe.

⁸ Nyambi ya Ngula wa nceshe na shikeketima, wabulanga kupilama shawangu, wenzala na shishemo sha mwaya myaka.

⁹ Nyambi ya Ngula wamuwahe ku nimwabo, kami wa shikeketima ku nimwabyo alengele.

¹⁰ Obe Nyambi ya Ngula, bibumbwabumbwa byobe nimwabyo bikakuyemeza, pe bantu bobe nimwabo ba kuyela mitima bakakukambilila.

¹¹ Bakamba bya wuwahe wa wene wobe, na ku shimika bya ngovu zobe,

¹² na kuholola ku bantu nimwabo bya milimo yobe ya ngovu, na wuwahe wa maleema a wene wobe.

¹³ Wene wobe wenga wene wa mwaya myaka, kulela kwobe kukekala ku mikoka nimwayo. Nyambi ya Ngula wenga wa kwoloka ku mazu wendi nimwawo, na shishemo kunebye atenda nimwabyo.

¹⁴ Nyambi ya Ngula ukuyavwa obo banawu, na kupindula banalemenene.

¹⁵ Bya kuyoya nimwabyo bikupenza na kulumbeza kukwobe, pe ukubipana byakulya ha shikati sha kufwanina.

¹⁶ Ukufukulula mu liboko lyobe, na kwikutisha byuma nimwabyo bya kuyoya ebye bakushinga.

¹⁷ Nyambi ya Ngula wakulunga mu zinzila zendi nimwazo, wekala na shishemo mu nebye atendanga nimwabyo.

¹⁸ Nyambi ya Ngula uli hahepi nanobo nimwabo bakwihana kukwendi, ku nimwabo bakwihana kukwendi mu kupwisha.

¹⁹ Ukupana ku nobo ba kumutina ebye bakushinga, kami ukuyuvwa kulila kwabo na kubapulwisha.

²⁰ Nyambi ya Ngula ukukinga bantu nimwabo bamuhaka, ngoboni ukalobesha bakuluwa nimwabo.

²¹ Kanwa kami kakayemezanga Nyambi ya Ngula, mwanga bibumbwabumbwa nimwabyo bikayemeze lizina lyendi lya kuyela mwaya myaka.